Dt 11.September 2023 khan Mizoram Writers Association chuan hun danga an lo tih thin angin Aizawl Vanapa hall-ah lehkhabu zawrh chhuahna runpui karkhat awh tur bul tanna buatsaih a leh a. A ni khatnaah lehkhabu Rs 114859.00 man lai hralhchhuah anih thu chhuah a ni a. A lawmawmin lehkhabu phochhuahna runpui buatsaihtu MWA hi an fakawm hle mai. Lehkhabu hi englai pawhin lehkhabu dawrah zawrh a ni a. Mi tam tak lehkhabu chhiar ngaina mi chuan an chhiar duhzawng chu dawrah leiin an chhiar thei reng a. Amaherawhchu hetia phochhuahna runpui buatsaih anih hian lehkhabu lei lem lo tur mi tam takin an lei phah a. An chhiar phah a ni.
Lehkhachhiar hi mimal tin tan finna leh hmasawnna ani tih hi kan hria a. Chhiar tam na na na chuan an hmang tangkai a. Ngaihtuahna hman fim nan an hmang lo thei lova. Kan lehkhabu chhiar hi kan hmang tangkai miah lo emaw kan tih tam tak hi kan hriat loh hlan hian kan tangkaipui thin. Lehkhabu pakhat chhiar avanga fin thutna a ni lova. Amaherawhchu chhiar tam chuan a chhungrilah khungkhawm chin a nei a. Amahah khan hmasawnna zawi zawiin a lo siam a. Ama hriat loh laiin chhiar tam chuan finna a lo khawl thin ani zawk a. Hriat tamna hi vawilehkhata neih thut theih ani lova. Zawi zawia khawlkhawma neih tam chi a ni a. Chhiar tam chuan a hriat loh hlanin finna a khawl khawm a ni.
Hnam ropui ni tur chuan mifing kan neih tam a ngai a. Lehkhabu chhiar tam chu finna a nih si chuan lehkhabu chhiat theiha ziaktute chu hnam fing chherchhuaktute an ni a. Hnam fing ni tura chherchhuaktute lo puibawm a, an kutchhuak lo vawrh darhtute chu ram rawngbawltu ropui an ni kan ti thei ang. Chuti a lo nih chuan lehkhabu phochhuahna runpui buatsaihtute pawh chu mifing buatsaihna khawla thawktu tangkai an va ni em. Chuti taka hnam tana hna tangkai chu mipui hian kan theih tawka kan tawiawm an phu hle mai. A thei thei hian hetiang mi tangkaite thiltih hi kan hlut thiam a pawimawh a. Mi puitling inti chin chuan kan remchan dan ang anga tlawh ve hram hram kan tum a va tha em.
Chutih rualin kan ram hruaitute hian lehkhabu phochhuah runpui buatsaihna hmun tlawha, ram hruaitu, mipui ngaihsan an nihna anga mipui kawhhmuhtu ni thei se an va ti tha dawn em. Mitin hian kan mi ngaihsante ngaihhlut hi kan entawn ani si a. Kan ram hotute hian helam hi han hawi tel hram teh se.