Aizawl : Kolasib District Information & Public Relations Officer thar C. Lalhruaitluanga’n nimin khan a pisa ah Kolasib District MJA member te kawmin, an lo dawnsawn danah lawmthu a hrilh.
Kolsib DIPRO chuan Information & Public Relations Department leh MJA in thawhhona ṭha tak an neih ṭhin chu chhawmnun zel a nih a beisei thu a sawi a. Sorkar hmalakna hrang hrang puanzar kawngah te, mipui hnena zirtirna ṭha thehdarh kawngah leh ram siamṭhat kawnga rawtna ṭangkai chhawpchhuah kawngah te chanchinbumi te chu hmanraw pawimawh ber pakhat an nih thu sawiin, an rawngbawlna chu ṭhahnemngai taka kalpui zel turin a chah.
Tunlaia social media hman dik loh tam em em chu veiawm a tih thu sawiin, Kolasib DIPRO thar chuan MJA member-te chu social media hman chungchanga mipui zirtir leh kaihhruai chu an mawha la tel turin a chah a. Kawng hrang hrangah amah finchhuaha, thurawn pe ṭhin turin a ngen bawk.
Kolasib District MJA te hi an President Andrew Vanlalauva’n hovin, District MJA hmalakna hrang hrang te a sawi a. Kolasib District chhunga sorkar hnathawh leh mipui nghawng harsatnate a hmuna tlawha an enfiah ṭhin thu te, chu chuan thuneitute leh mipui beng thlenga, hmalakna chak zawk a awm phah ṭhin thu leh hmalakna tharthawh a nih ṭhin thu a sawi a. Press tour leh project site visit te chu thil ṭangkai tak nia a hriat thu a sawi.
He inkawmhonaah hian ram leh district tana thawhhona tura pawimawh hrang hrang te an sawiho a ni.