Aizawl : MPCC thupuangtu Dr Lallianchhunga chuan Mizoram leiba chu MNF sorkarin mipuite rulh tura huai taka a puk anih avangin a hmanna kawngah mipuite pawhin thikthu an tihchhiat hle a ngai tih a sawi.
Nimin khan Dr Lallianchhunga chuan Champhai Venglaia Special Assistance to States for Capital Investment (SASCI) sum atanga sak tur Multi Utility Complex chu hmun tlawh a enfiahnaah thu a sawi a. SASCI sum chu sorkar laipui atanga a thlawn a lo kal a ni lo vin, kum 50 chhunga a pung awm lova rilh leh tur rulh leh tur loan a nih thu a sawi a. “A rultu tur pawh mipui te tho kan ni. Ram leh khawtlang tana rotling ngei tur siamna atan chauh hman phal a ni,” a ti.
MPCC thupuangtu chuan MNF sorkar chu pawisa puk a huai em avangin Mizoram leiba pawh kum 5 lek chhung hian a tam hman dawn hle tih sawiin, “Kum 2023-a Mizoram a mihring cheng tur zat 13,70,000 atanga chhutin, nausen piang hlim pawhin leiba Rs. 98,958 vel nei ang an ni a, a pawi hle a ni. He’ng leiba te hi MNF sorkar hotu te’n mipuite rulh tura huai taka an puk a ni a. Chuvangin, a hmanna kawngah hian mipuite pawhin thikthu kan tih chhiat hle a ngai a ni,” a ti.
Champhai South bial a Indian National Congress (INC) atanga ding tura Dr Lallianchhunga chuan Pathian leh mipui zarah Congress party an sorkar chuan Mizoram sum leh pai harsatna chinfel hi an hna hmasa tur a nih thu a sawi a. Sorkar hnathawkte a hun taka an hlawh pek te leh Healthcare bill ba chinfel te an ngai pawimawh dawn a. Sum puk belh reng chunga harsatna an la tawk zel chu sum leh pai enkawl thiam ram hruaitu a neih loh vang a nih thu a sawi bawk.