Kolasib bawrhsapin Kolasib district-a chaw ei khawmna leh thil tih khawmna reng rengah ui sa telh phal a nih loh thu a puang.
Kolasib Bawrhsap John LT Sanga chuan nimin khan public notice tichhuakin vety director hnen atanga lehkha an dawn angin The Mizoram Slaughter (Amendment) Act 2020 Section 2(a) chuan mihring ei atana ran talh phal zingah ui a chhiar tel loh avangin ui talh chu dan loa ngaih a lo ni ta tih leh Food Safety & Standards (Food Products Standards & Food Additives) Regulation 2011 (2.5.1) chuan mihring ei atana ran talh theihte zingah ui a telh lo bawk tih a tar lang.
Hengte avang hian chaw ei khawmna leh thil tih khawmna reng rengah ei leh in atan tu man ui sa an telh tur a ni lo tih tar langin, sorkar hriattirna chu Kolasib district huam chhungah zawm theuh tur a ni tih a tar lang bawk.
Tar lan tawh thin angin Mizoram State Animal Welfare Board (SAWB) chuan August thla tir lam khan Mizoram sorkar hnuaia department hrang hrangte chu chaw an eikhawmnaah uisa telh lo turin a lo ngen tawh.
State Animal Welfare Board thutkhawma an rel angin board-a tel, JB Foundation pawhin Aizawl Uisa Zuar Association-te chu uisa zuar tawh lo turin a hriattir tawh bawk a, hemi chungchangah hian uisa zuar hruaitute chuan chief minister hmuin, CM erawhin uisa zuarte chu hriattirna an hmuh chu sorkar order a nih loh avangin thu tling a nih loh thu leh lungngai lo turin a lo hrilh thung a ni.