Aizawl Smart City Limited (ASCL) hnuaiah zirna in hrang hrangah Smart Classroom 225 siam a ni dawn a, hemi atan hmanraw hrang hrangte chu D&PA Department changtu, Deputy Chief Minister Tawnluia’n nimin khan a hlan.
Smart Classroom Project hi school education department hnuaia Aizawl khawpui chhunga zirna in 94 tan smart classroom 116 leh higher & technical education hnuaia zirna in 14 tan smart classroom 109, a vaiin zirna in 108-ah 225 siam a ni dawn a. Interactive board 75 inches-a hlai, 3KVA power back up keng tel dah a ni dawn a. Heng bakah hian Govt. Primary School 121-te computer, printer leh a kaihhnawih dangte pek an ni dawn bawk a ni.
Hmanraw hlantu, Deputy Chief Minister Tawnluia chuan Aizawl Smart City Limited hnuaia Smart Classroom Project kalpui chu phurawm a tih thu a sawi a, “Hei hian thiam thil zir leh zirna tihhmasawn kawngah zirlaite leh zirtirtute nasa takin a pui thei dawn a ni,” a ti a. Infiamna kawngah pawh hmalak niin, “Aizawl Smart City Limited kaltlangin hmun rukah astro turf phah hna kalpui mek a ni,” a ti bawk.
Smart Classroom Project atan hian project senso zat chu Rs. vaibelchhe 7.43 a ni a. M/s Silicon Infotech Pvt. Ltd chu supplier niin August 16, 2023 khan inremna siam a ni a, September 30, 2023-ah chuan Smart Classroom hmalakna hi peih fel vek tawh tura ruahman a ni.