Mizoram State Commission for Women (MSCW) chuan tun hnaia Instagram-a live-a sex an hmang lai tichhuaktu hmeichhe pakhat chu dan hnuaia hremna pek ngei an duh a, social media-a mipat hmeichhiatna rawngkaia chet tlat awm thin chungchangah inzirtirna tha nei turin kohhrante an ngen bawk.

MSCW chuan nimin khan The Assistant Inspector General (Legal) chu lehkha thawnin tun hnaia Instagram-a sex hmang lai video tihchhuah chungchang chu an ngai thu tak hle a, a thil tih chu Mizo khawtlang nun a tha lo zawnga hruai kawi thei a nih avangte leh pawikhawihna serious tak a nih avangin pawikhawihtute chu danin a sawi anga hremna pek ngei an duh tih an tar lang.

Hmeichhe pakhat pawikhawihna chu dan anga chhui zuia dan hnuaiah hremna pek a nih ngei theih nan chargesheet siam zui ngei turin Cyber Crime Police Station a beisei tih leh an hmalak zuina report pawh order tihchhuah a nih atanga ni 30 ral hmaa MSCW hnena thlen turin an beisei tih an tar lang a ni.

MSCW-in a tar lan danin tun hnaia Instagram-a live-a sex an hmang lai tichhuaktu hmeichhia chu ruihtheihthilin a tihbuai avanga chhia leh tha hriatna fim hmang lo a ni a, Section 67A of IT Act, 2000 anga hrem theih ngei a nih thu tarlan tel a ni.

MSCW chuan social media-a Mizo nula leh tlangval, mipat hmeichhiatna rawngkaia an chet tlatna thin chungchangah uar zawka zirtirtna tha nei turin kohhran pawl hrang hrangte a ngen bawk.

Tun laiah sex video leh mipat hmeichhiatna lama rilru hruaikawi thei tura Mizo thalai, a bikin Mizo hmeichhiate social media-a an inpho lang thin hi a vei hle tih tar langin, hetianga ualau taka mipat hmeichhiatna rawngkaia social media hman chungchangah hian inzirtirna tha leh him zawk thalaite hnenah uar taka kalpui hram turin a ngen tih a tar lang.

MSCW chuan Mizo hmeichhia dan dik loa hnathawk tura ram danga thawn chhuah harsatna tawkte chu rang taka zawng chhuaka Mizorama haw duhte hruai haw a nih theih nana hmala thuai turin home secretary a ngen bawk a, hemi chungchangah hian sorkar laipui hotute, ram dangte bepawpa hma la turte, an hmalakna chu order tihchhuah a nih atanga ni 15 ral hmaa SCW hnena thlen turin an ngen tih a tar lang.

MSCW-in Suo Moto a tihchhuahah chuan Mizo hmeichhia ram pawna hnathawk tura thawn chungchang police-in an chhuinaah ram danga hnathawk tur thawn chhuak thin Mizoram Private Placement Agencies Regulation Act, 2015 hnuai inziak lutte zinga private placement agency 26-ten dan an bawhchhe ngei nia a lan thu tar langin, heng agency-te hi an permit cancel a nih theih nana hma la turin Aizawl DC a hriattir bawk a ni.

YMA hruaituten home minister sawipui

Central YMA hruaituten nimin chawhnu khan Home Minister Lalchamliana chu a pisaah an kawm a, tun hnaia social media lama hur sualna hluar an ngaimawh thu thlenin thil sual titute chu dan anga hremna pe turin an ngen.

Home minister hnenah YMA hruaitute chuan tun hnaiah ram chhungah mipat-hmeichhiatna, hmeichhiat-hmeichhiat leh mipat-mipatna hman sual a hluar chho ta leh heng hur sualna hrang hrangte mipui vantlang hmuh theih tura social media platform hrang hrang heng – Whatsapp, Instagram, YouTube leh a dangteah hmuh tur a tam ta chu an ngaihmawh thu an thlen a. Heng hur sualna lam vantlang mipui hmuha pho chhuah a ni hi mipui vantlang zah lohna leh dan palzutna lian tak a nih thu an thlenin, thil sual titute leh dan zawm lotute zawng chhuaka an phu tawk hremna pe ngei turin an ngen.

Central YMA hian hun kal tawh leh tun hnaia agency hrang hrangin thalaite eizawnna tha zawk ngaihtuahsak theia inzuara mi thahnem tak ram pawna thawn chhuahte harsatna tawh mek chungchang leh agency hrang hrangte chhui chianga hrem ngaite hrema Mizo hmeichhiate dinhmun hima an awm theih nana hma la turin an ngen bawk.