Virat Kohli leh KL Rahul ten bat hmangin India tan an thawhhlawk hle a, ball nen Kuldeep Yadav che tha bawkin Pakistan chu Asia Cup-ah run 228 in an sawp.
Pakistan a R. Premadasa Stadium a inkhelah India hi vuak hmasak tir niin Kohli leh Rahul ten run 122 leh 111 an siam a, India in over 50 chhungin run 356 an siam a, wicket hnih chiah an hloh.
India wicket hnih hlohte hi captain Rohit Sharma leh Shubman Gill te an ni a, half century siam ve ve in Indian batsman te an che tha hle.
Pakistan batsman te lakah bowler Kuldeep Yadav a che tha a, run 25 chiah pe in wicket 5 a la a, Pakistan hian run 128 bak an siam lo.
India in one-day international a Pakistan a hnehna sang ber a ni a. Nizan khan Super Four inkhelah Sri Lanka nen an inkhel ve leh nghal.
India tana che tha Kohli chuan, “KL leh kei hi khelhdan pangngai tak nei kan ni a, kan din ngheh a partnership mumal a awm tawh chuan chet mawi chiam kan tum loh avangin thiah mai kan har thin.” tiin an chetthat dan a sawi.