- Dr. C. Lalrampana
- A KAMKEUNA
Silchar-a economic blockade an siam apianga buai phili chung thin khawpa ei leh bãr, buh leh bãla intodelh lo Mizoram state rethei ber pawla ngaih, OMB hmanga leiba ngah si hian kan ei leh bãr rawn phurluttu ber Food Corporation of India, Aizawl Division-te hi kan tangkaipui hle a; lawmna chang kan hria em tih erawh ngaihtuah tham tak niin a lang. Anni hian kawngpui panggngai National Highway-54 a Truck lian hmanga buhfai supply an rawn phurh luhtir bakah Bairabi rel hmangin kan buhfai mamawhte a hun takah an rawn phurh luhttir zung zung thin a; kumtin buh leh bãl hãwp khawp thar ve ngai lo mah ila; vawiin thleng hian mangang taka tal buai lovin, hrawk hrui chat em lovin kan la awm theih phah a, an fakawmin an tangkai hle.
- SILCHAR KAWNGPUI NH-54
Brig. T. Sailo (L) CM nih laia Silchar kawngpui NH-54 economic blockade tuma Vai buh uih leh atta chhum chawa kan rin thin kha ngaihawm tehchiam lo mah se, theihnghilh erawh a har hle. Khatih lai khan rel kawnga thlunzawm kan la ni bawk si lo; vaibuhfai phurh nan TATA truck ‘S’; ‘D’; leh ‘E’ model tum khata 10tons, kilograms 9070 vel phur thei bak buhfai phurhna tha kan la nei lova, Zoram mipui riltam intodelh si lote tan chuan hniang hnãr taka nitin mamawh leh buhfai neih a har hle. Tuna kan truck lianpui puiho erawh hi chu tawn (tonnes) 16.2-18.2; 25-28.5; 37-43.5 thlenga rit phur theite pawh a awm tawh a; mahse, kan leilung hi a la naupan evangin rit tak tak phur turin kan kawngpui neihte hian a zo meuh lova, bungrua leh buhfai mamawh hniang hnãr taka phurh luh a har thin hle a; rel wagon hi awm lo ngat phei se’ng chuan harsatna tam tak kan nei ngei ang. Khatih hun lai pawh khan Supply & Transport Department, Govt. of Mizoram khan theihtawp chhuahin FCI atanga buhfai chaw chhuakin NH-54 KM 179 atangin a theih ang angin buhfai a phurluhtir thin a; an fakawm thin hle. Khatih lai ai khan kawngpui hi a zau deuh ta e, tih mai loh chu a chhiat ngaiin a la chhe reng emaw tih tur a ni. Kan sorkar hrawn apiang hian Silchar kawng lam chauh ni lo kawng dang tha kan siam a ngai tih sawi chamchi thin mah se, tun thleng hian kawng dang rintlak sial tum erawh an la awm lo chu a nih hmel hle. “Aw! Lalpa a ngai bawk* kan ti reng mai chu a ni e.
- BAIRABI REL
Kolasib District-a khaw pawimawh tak Bairabi hi lum viau mah se, rel station awmna hmun pawimawh tak a nih avangin nula hãng ngaihno bei mi lêm thiam leh zei tak ang mai niin kan hnualsuat tak tak thei lo. He rel kawng hi a code No chu BHRB niin Bairabi atanga Katakhal Junction thlun zawmtu relkawng pawimawh tak a ni. Mach 21, 2016 khan zawh fel niin km 84.25 laia thui a ni a; platform 3 neiin passenger leh bungraw phur rel service pawimawh tak a ni. Bairabi rel hian vawi khatah 42 wagons-a rit a phur thei a; Rel wagon 1-a rit hi kilogramme chuan 835-850 kgs. vela rit a ni. Tum khatah wagons 42 a phur thei a nih chuan a kilograms chuan 35,700 a phur thei thin tihna a ni. Hetiang khawpa tangkai a nih avang hian Mizoram mamawh buhfai leh bungrua, chawhmeh ilo chihrang hrang rawn phur luttu tangkai tak a ni. National Highway dan pin a nih emaw leimin vanga lirthei pangngaiin bungrua leh nitin mamawh a phurh theih loh pawhin Rel kawng danpin a nih ve lem loh chuan Bairabi rel hmang hian engkim kan chaw lut thin a ni. Tuna Sairang thlenga lo lut tur rel kawng duan mek pawh hi peihfel a nih hunah chuan Zoram mipuite tan a tangkai hle dawn a; a nghahhlelhawm tawh takzet a ni.
- A TLÃNGKAWMNA
Kum 2016 atanga tun thlengin Bairabi rel hi tangkai taka kan hman mek laiin rela buhfai phurh luhsa hlãn thlak kawngah Food Corporation of India, Aizawl Division hotute chuan Sept. 2, 2023 khan an harsatna tawh thin chu Zoram mipuite hriat atan an tarlang a; he an harsatna tawh mek hi ram dang mi emaw, phai vaiho emaw, meiteiho emaw, Myanmar sipai junta-te emaw vang ni lovin mirethei chhumchhiate dãwm kangtu bera ngaih, kristian nundan tha ngaisang a, tanpui ngaite tanpui thintu, hunawl hmang tha thin; Zofate hmasawnna ngaihtuahtu, theihtawpa ruihhlo do thin leh ram leh hnam humhalh mektu ‘Young Mizo Association (YMA)’ ngei an nih thu tarlan a ni ta mai hi a pawiin a zahthlak hle niin a lang. FCI Aizawl Division Manager Pi Zodinpui Raltein a tarlan danin Rel atanga buhfai lo thleng hi Sundaya a lo thlen chang a awm thin a; hetih lai hian Bairabi North YMA chuan Sunday-a buhfai hlãn thlak hi an phal thin loh avangin cheng nuai 10 chuang zet an chawi tawh thu a tarlang a. Rela buhfai lo thleng thin hi a thlen atanga darkar 5 chhunga hlãn thlak a nih loh chuan cheng tam tak tak an chawi thin a; chuvangin, buhfai quintal tam tak lei belh theihna tur hi a chuang tlaia sen a ngaih phah ta a ni tih a lang chiang hle. Railway timetable hi FCI hotute siam ni lovin Railway thuneitute ruahman leh duan a ni a; Sunday-a phurhluh loh theih ni se’ng chuan FCI hotute duhdan ve tho ni mah se, an thuneihna piah lam a nih avangin an mangan phah hle a ni. Kum khatah a tlem berah sunday vawi 5 vel buhfai lo thleng ta se, FCI, Aizawl Division hian Rs. 50 lakhs (nuai sawmnga) chuang fe an chawi dawn tihna a ni a; hetiang hi thil awm dan a nih takzet chuan thil lungchhiat thlak tak a ni dawn a; chuvangin, FCI pawh hian buhfai min phurhsak theih loh hun a thleng thuai mai ang tih a hlauhthãwnawm hlel love.
Sorkar hnathawk leh pvt. company-a thawkte zingah hian mipui mamawh khawih chi darkar 24X7 thawk tluan thak chi an awm a; henghote hian chawlhni leh sorkar chawlh (holiday) hrang hrangahte chãwl ve duh hle mah se, an hnathawhin a rem ve loh avangin an thawk tluan zak zak thin a ni.
Bairabi NorthYMA-in hetianga khuahkhirhna, harsatna (restriction) a siamsak hi Central YMA hian a khap ngam a ngai ang. Mizoram hmun dangah pawh mipui harsatna emaw, Sorkar hmalakna tibahlah zawnga hmalatu Sub-Hq & Branch YMA an awm a nih chuan a rang thei ang berin CYMA hian umzui nghal zat zat thin se a lawmawm ngawt ang. Sunday niah pawh rel wagon hi lo thleng se a ni (day) hi Pathian lovin he ni serh ve lem lo, inhlawh duh an awm a nih phawt chuan FCI Aizawl Division hotute manganna sutkian nan leh mipui sum renchem nan buhfai hi hlãn thlak vat vat a ngai a ni tih hriain ram leh hnam humhalh dan kawng dik zawk zawh tawh ni se a lawmawm ngawt ang.