- Ruata
Hyundai midsize SUV hmingthang leh hralh kal tak Creta chu a thar tichhuak turin company lam an inbuatsaih mek a, he SUV mawi leh mite lei tam em em mai thar lo chhuak tur hi 2024 model a ni dawn a, kum 2024 February thlaah chuan tlangzarh hman beisei a ni.
Hyundai Creta hi India rama passenger vehicle hralh kal zualah a lang zat zat reng a, a awmna huang, SUV huangah ngat phei chuan SUV hralh hnem ber te zinga mi a ni. Hyundai Creta hi lirthei changkang leh mawi tak a ni a, Mizoramah ngei pawh he lirthei lei hi an tam viau a ni. Tunah hian design thar leh landan thar nen, kentel thil thar te nen kum 2024 chhuak tur India ram chuan a ur lawk leh mek a ni a, hei pawh hian market lamah Creta hi a rawn la chet that pui chhunzawm zel beisei a ni.
- 2024 Creta
2024 Hyundai Creta hi nakuma lirthei chhuak tur zinga India ramin a nghahhlelh ber pawl a ni a. Kumthar veleh hian January thla laihawl vel atangin Chennaia lirthei siamna hmunpuiah siamchhuah tan a ni nghal dawn a. A thlaleh chiah, February thlaah hian tlangzarh theih beisei a ni. Hetihrual hian company lamin chiang lehzualin a hun tur te an rawn puang ang a, a hun erawh la inthlak thei tho a ni a. Kum 2024 chawhma lamah chuan an tlangzarh ngei ngei erawh beisei a ni.
A thlalak kan han tarlanah hian a lirtheia inthlak tur leh thil thar kan hmu tur chu a lang ve nual thei awm e. Hmel thar chu a nei ngei dawn niin a lang a, tuna a design hloh lutuk si loin thil thar eng eng emaw a design lamah pawh kan hmuh hmel a. 2024 Hyundai Creta facelift-ah hian Hyundai lirthei changkang leh man to zawk Palisade SUV design lam a rawn pawl dawn a ni.
2024 Creta lo chhuak turah hian an dah pawimawh ber te zinga mi tur ni a beisei chu a lirtheia chuangte himna lam a ni a. Hemi atan hian Advanced Driver Assistance System (ADAS) technology chu an dah ngei beisei a ni. He himna hmanraw hnuaiah hian adaptive cruise control with stop-and-go, lane-keeping assist, lane departure warning, forward collision warning, lane following assist, blind-spot collision avoidance assist, rear cross-traffic collision avoidance assist, leh leading vehicle departure alert tihte a awm ang a. Himna hmanraw tangkai a nih mai bakah hian he lirthei khalhtute tana khalh ti nuam leh ti awlsam tur a ni dawn a ni.
Creta thar turah hian 360-degree camera, feature tha tak tak keng tel a awm ngei beisei a ni bawk a. Hyundai BlueLink connected car technology chu a neih chhunzawm ang a, feature thenkhat an rawn belh hmel bawk a, He technology hnuaiah hian stolen vehicle immobilization, valet parking mode, leh stolen vehicle tracking te pawh a awm dawn a ni. 2024 Hyundai Creta thar turah hian touchscreen infotainment system leh high-definition digital instrument cluster thar an rawn dah beisei a ni bawk a ni.
2024 Hyundai Creta hian Verna pawhin a hman ang, 1.5L turbo petrol khawl, 160bhp power pechhuak thei a hmang ang a. Tuna 1.5L naturally aspirated petrol leh 1.5L diesel khawl, 115bhp power pechhuak thei ve ve te hi a hman zel hmel bawk a. Transmission lamah chuan manual leh automatic gearbox duhthlan tur hrang hrang, a hma ang bawkin a awm chhunzawm leh dawn bawk a ni.