Vietnam khawpui, Hanoi-a paratment block-a kangmei nasa tak chhuakah mi pariat vel an thi a, mi eng emaw zatin hliam an tuar bawk.
State sorkar chanchinbu chuan chhawng kuaa sang in atang hian mi 70 vel chhanchhuah an nih thu a puang a. Tual chhung mite erawh chuan thi hi tuna sawi aiin an tam daih zawk niin an sawi ve thung.
Kangmei hi Thawhlehni zana chhuak kha niin thelh mih tawh ni mah se chhanchhuah hna thawh chhunzawm zel a ni.
Khawpui thang chak tak, Hanoi-a thuneitute chuan apartment sak thar tam tak chuan kangmei laka himna tura dan zam an zawm famkim lo thin niin am sawi.
He khawpuiah hian kum 20 liam ta lek chhung khan mihring cheng a let li zeta thangin tunah hian mi maktaduai 5.25 vel an cheng tawh.
Khawpuia police-te sawi tual chhung chanchinbuin an chhuah chhawnah chuan mi 30 chuang an thi niin an tar lang a, heng zingah naupang eng emaw zat an tel bawk.
Kangmei chhuah chhan hi chhui zui mek a ni a; mahse, thil thleng hmutute chuan lirthei hunna hmun, motorbike an hun khah tlatna hmun atanga chhuak niin an sawi.
Mi chengte chuan Thawhlehni zan dar 11:00 (India-a zan dar 9:30) velah thil puak ring tak an hriat thu leh meikhu dum tak a chhuah nghal chuah chuah thu an sawi.
Chhungkaw pakhat chuan an tukverh hawn daltu thira tlak dalna tichhiain an chhuak a, leilawn hmangin an thenawm inah an lawn kai niin an insawi.
“Puihna dila an thawm a tam hle a; mahse, kan pui tam thei si lo,” tiin a bul hnaia cheng hmeichhia, Hoa-i chuan AFP news agency a hrilh.
“Apartment hi tlan chhuahna tur a tlem hle a, tuna thi tate tan hian chhuah ngaihna a awm lo a ni,” a ti.
Thelh tur hian fire engine 15 lai thawh chhuahpui a ni a; mahse, a kal luhna tur a zim em avangin hnaih takah erawh an kal thei chuang lo.
Tun tuma kangmei chhuak hian heng lai hmun, hmasawn takah kangmei laka himna tura hmalakna leh invenna a chhiatzia a tilang chiang hlea ngaih a ni.
Nikumah pawh khan Vietnam chhim lama karaoke club-a kangmei chhuakah mi 30 chuang an thi a, he hmunah pawh hian tukverh chu leirawhchana rem niin tlan chhuahna tur a awm lo a ni.
Tun tuma chhiatna thleng ang hi Asia khawmualpui chhimchhak lam ram, Thailand leh hmun dangah pawh a thleng fo thin a, dan zamte zawm a hlawh loh piah lamah a kengkawhtu turte pawhin an kenkawh that tawk loh vang a ni fo thin.