Afghan university-te chuan hmeichhia leh mipa zirna a hranga an kalpui a ngai dawn a, an incheina tur pawh a thar duan a ni dawn tih an ram roreltu thar, Taliban chuan an sawi.
Higher Education Minister Abdul Baqi Haqqani chuan hmeichhiate chu lehkha zir an phalsak dawn tih a sawi a; mahse, mipa nen hmun khatah a ni thei dawn lo.
Zirlaiten an zir tur subject pawh ennawn a ni dawn tih a sawi.
Kum 1996 leh 2001 inkara Taliban-in ro an rel lai khan hmeichhiate hi sikul leh university-a an kai an khap.
Taliban hian tun tumah erawh hmeichhiate hi lehkha an zir emaw, hna an thawh emaw an phalsak tawh dawn tih an sawi a. Mahse, August 15-a ram an thunun hnuah khan vantlang hriselna lama thawk tih loh chu ram chhung venhimna a that hma chu chhuah an khap rih.
Taliban hian Inrinni khan presidential palace-ah an flag an zar a, hei hi rorelna an kalpui tak tak dawn tih lanna pakhat a ni a. A tukah chiah higher education policy thar hi an puang zui.
Policy tharah hian Taliban rorel hma nen danglamna a awm nual a. Zirlai hmeichhiate chu inchei dan tur duansak an ni a, university chu mipa nen hmun khatah kal thei mah se an inthut pawlh thei dawn lo.
Haqqani-a chuan ruahmanna thar chungchangah hian, “Muslim an ni a, an pawm mai a ngai,” a ti.
Hetianga mipa leh hmeichhia a hranga zirtir mai tur anga rawtna a awm a, hmeichhe zirtirtu an ngah tawk loh vangin an ti lo nia sawi chungchangah Haqqani chuan hmeichhe zirtirtu hi an ngah tawk tho va, a tul ang zelin thil an kalpui dawn tih a sawi.
“University-a zirlai kai thei zatin engkim hi a nghawng,” a ti a. “Mipa zirtirtu chu parda phen atanga zirtir tur emaw, technology hmang emaw pawhin kan ti thei,” a ti.
Primary leh secondary school-ah pawh hmeichhia leh mipa hi a hranga awmtir an ni dawn a, hei hi chu Afghanistan-a kal dan phung pangngai sa a ni.