India sorkar chuan ni nga awh tur parliament session bik a koh hma ni chiah, Thawhtanni hian all-party meeting a ko.
Parliament special session hi thla tirah khan Union Minister Pralhad Joshi chuan neih tum a nih thu a puang a. All party meet neih tur pawh hi amah bawkin X-ah a tar lang.
“Tun thla ni 18 atanga session neih turah hian all-party floor leaders meeting chu ni 17 tlai dar 4.30-ah koh a ni a. Sawmna pawh hruaitute hnenah email-a thawn tawh an ni a, lehkha pawh pek an ni ang,” tiin a tar lang a. Kannada tawnga a thu tar lan lehna pawh a dah tel.
Joshi-a hi Lok Sabha MP niin Karnataka-a Dharwad bial atanga thlan tlin a ni.
Thawhtanni tlaia all-party meeting-ah hian karleha session-a sawiho turte an sawiho rin a ni a. Tun tum session-ah hian sorkarin India tih chu Bharat tia thlak a tum nia sawi a awm avangin ngaihven leh sawi pawh a hlawh nghal hle.
All-party meeting koh chungchangah hian CPI hruaitu, D Raja chuan, “Hei hi chu tih dan thin pangngai ve mai a ni a; mahse, special session koh a nih hma tawh zawkah khan sorkar hian eptu hruaitute a rawn tawh zawk tur a ni,” tiin news agency ANI hnenah a sawi.
“Tumahin special session-a sawiho tur (agenda) hi kan hre lo va. Eng thil nge kan khel dawn ni?” a ti.
Kar hmasa khan President Droupadi Murmu-i pisain G20 hruaitute a sawmnaah ‘President of Bharat’ tia dah niin hei hi eptute chuan an helh hle a. Sorkar erawh chuan ram danpuiah pawh a lang nia sawiin, ‘India, that is, Bharat, shall be a Union of States…,’ tih chu tanchhanah hmangin an ti dik lo chuang lo niin an sawi.
Special session-ah hian parliament building hman lai atanga a thara insawn pawh koh chhan a nih rinna a awm bawk a, thenkhat chuan September 19-ah insawn a ni dawn niin an sawi.
Sorkarin special session a ko hi eptu hruaitu tam takin an sawisel a. Thenkhat chuan ‘India-a kût pawimawh ber’ Ganesh Chaturthi lai kher a ni pawh an sawisel tel a, hei hi Thawhlehni hi a ni.
“He special session hi India-a kût pawimawh ber, Ganesh Chaturthi lai a ni dawn a, Hindu rilru tihnatna a ni tel!” tiin Shiv Sena UBT-a an hruaitu, Priyanka Chaturvedi chuan a sawi a. Nationalist Congress Party hruaitu, Supriya Sule pawhin a hun sawn a phut bawk.
Congress chief hlui, Sonia Gandhi-i pawhin Prime Minister Narendra Modi hnena lehkha a thawnah ‘special session hi political party dang tumah rawn lova koh’ a nih thu a ziak lang a. “Tute mahin sawiho tur engnge ni ang tih ngaihdan pawh kan nei lo hial a, min biak chinah chuan ni nga chhung zawng hi ‘government business’ tih ngawt a ni,” tiin prime minister hnenah hian a thlen a ni.
Sorkar erawh chuan session-a sawiho tur zingah hian India chu ‘ram changkang’ tia rin luh chungchang pawh a tel nia sawi a ni a. Thlaa inkah kaina Chandrayaan-3 te, Delhi-a kar hmasaa hlawhtling taka nghah, G20 Summit chungchang te pawh a tel niin an sawi.