Aizawl : Chief Minister Zoramthanga leh Air Officer Commanding-in-Chief, Easter Air Command, Air Marshal SP Dharkar te chu thawhlehni khan inkawmin, civil mite leh Air Force te’n an inhmantawm theih airport leh heloport din dan tur an sawi dun.
Chief Minister pisa-a an inkawmnaah hian Air Marshal SP Dharkar chuan, tun tuma Mizoram a tlawh chhan ber chu India hmar chhak venhimna tihchak zel nana Mizorama airport tha heliport nei tel, helicopter eng emaw zat chhawp theihna siamna tur hmunhma tha a awm leh awm loh a rawn enfiah a nih thu a sawi a. Chutiang tur hmunhma a awm a nih chuan theih tawp chhuaha tihhlawhtlin ngei a tum thu a sawi.
Chief Minister Zoramthanga pawhin Mizoram chhim lamah airport tha tak, civil leh Air Force lamten an hman tangkai theih tur awm se tha a tih thu a sawi a. Chutiang atana hman theih tur hmunhma chu hmun hnihah an hual thu a sawi chu, Air Marshal pawhin a rang lama a bawhzui nghal tur thu Chief Minister hi a hrilh nghal.
Air Marshal hian thawhlehni khan an hmunpui Shillong atangin Mizoram a rawn thleng a, Chief Minister a hmuhnaah hian Air Force Officer pawimawhte’n an telpui a ni.