Aizawl : Transport Ministe TJ Lalnuntluanga chuan nimin khan Champhai District-a hmasawnna hnathawh kal mekte leh hmalak tul te a hmunah kalin a enfiah.
Minister hian Ruantlang MUP leh MHIP Run sak lai mek a hmunah a en hnuah Ruantlang Mual Veng MHIP Run sak mek a tlawh bawk a. Heng insak mek te hi Rural Development Fund atanga sak a ni.
Heng bakah hian Mual Veng Community Hall atanga Zokhawthar World Bank Road kal pawhna MLA Fund hmanga laih zawh tawh chu SASCI Phase I kaltlangin white topping leh culvert siam turin ruahmanna a siam bawk a ni.
Minister hi khawtlang hruaitute nen inkawmin Ruantlang Water Supply Scheme NABARD kaltlanga siam anih theihna tura hmalakna kal mek chu a hlawhtlin theihna tura chak zawka hmalak anih thu a sawi a. Heng hmasawnna tura hnathawh mek te tha tak thawh a nih theihna nan Khawtlang hruaitute thawhpui turin a chah bawk a ni.
Nimin chawhnu khan Minister hian Tuipui khuaa Community cum Boxing Hall sak mek a en nghal bawk a.
Tuipui Hall hi Shyama Prasad Mukherjee Rurban Mission (SPMRM) leh MLA Fund tangkawp (convergence work) hmanga thawh niin, SPMRM atangin cheng nuai 40 leh MLA Fund atangin cheng nuai 10 senga thawh a ni a. A dung feet 86 leh a vang feet 36 a zaua sak a ni a, a liang (beam) san zawng hi feet 20 a ni.
A panna kawng cheithat leh Electrification tihfel a nih hunah Tui Hall hi hawn tura ruahman a ni.
Minister hi Lalrinawma Project Director DRDO Champhai leh official dangte bakah khawtlang hruaitute, tlawmngai pawl leh party hruaituten an tawiawm a ni.