Aizawl: MPCC thupuangtu, Dr Lallianchhunga chuan Pathian leh mipui zarah Congress party-in thuneihna changa a sorkar chuan mi tam takin eizawnna mumal tak an neih theihna turin hma an la dawn nia sawiin, “Congress party chu a ngaihna hretu party kan ni,” a ti.
Champhai South bial chhung, Tlangsam Congress Unit huaihawta nimina Tlangsam Bazar-a Street Campaign-ah Dr Lallianchhunga chuan Congress sorkar hnuaiah Champhai district chhungah sumdawnna boruak tha takin a kal thin a. Hmasawnna ruhrel eng emaw zat an siam hman bawk a. Hengte hi a nihna tur ang taka hman tangkai a nih theihna turin Congress party a sorkar leh a ngaih thu a sawi.
Champhai South biala Indian National Congress (INC) atanga ding tur, Dr Lallianchhunga chuan central-ah BJP leh an thawhpuite paih thlak an nih theihna turin tanrual a ngai tak zet nia sawiin, “India ram hi khawvel ram ropui ni thei tur chuan hnam tenau leh sakhaw tê zawkte pawh thlamuang taka kan awm theih a ngai a, BJP sorkar hnuaiah chuan hnam tenau leh sakhaw tê zawkte nepchepin kan awm zel dawn,” tiin, kum 2023 MLA inthlanpui hi thlarau indona a nih dawn avangin Pathian nung betute an tanrual a ngai takzet tih a sawi.
Congress party dinchhan zinga pawimawh tak chu sakhaw zalenna a ni tiin Dr Lallianchhunga chuan, Mizorama BJP inti haw em em, Delhi tlanga BJP hotute bawkkhupa chibai buk hnial leh hauh lo lemchan thiam tak political party-te hnawl turin mipui a sawm bawk.