YMA Central Co-ordination Committee chu nimin khan Tuikhuahtlanga Central YMA Hall-ah an thukhawm a, kumin October 24-26 chhunga Biate-a YMA Inkhawmpui Lian neih tura agenda lutte thlirin an thlifim.
Thutkhawm hi Central YMA President R. Lalngheta’n a kaihruai a, General Secretary Prof. Lalnuntluanga’n CCC meeting neih hnuhnung ber leh tun inkara Central YMA chetvelna leh hmalakna hrang hrang te, rorel thu bawhzui kawnga hmalakna report te a pe a, hemi hnuah YMA Inkhawmpui Lian Rorel Inkhawma tel tur agenda lutte thlirin an thlifim a, inkhawmpuia chhawpchhuah turin YMA khawih paruk leh YMA khawih pahnih leh chhiat ni that ni kaihhruaina ennawn te an dah.
Thurel tur an pawm zingah hian environment humhalhna kawngah hian Central YMA-in tun aia chak zawkin hma la rawh se tih te, environment clearance tel lo chuan Mizoram chhungah hmasawnna hnathawh a nih tawh loh nan Central YMA-in hma la rawh se, tih te, quality education a awm theih nan sorkarin tun aia chak zawkin hma la rawh se tih te, armed battalion pakhat tal Mizoram sorkarin din belh leh rawh se, tih te a tel.
CCC thutkhawmah hian Central YMA Office Bearer te, CEC member te, Sub-Hqrs. YMA aiawh mi paruk, Group YMA aiawh mi pahnih leh Aizawl khawpui chhung branch aiawh mi pakhat theuh an tel a ni.