ZPM Leader Lalduhoma chuan tun laia party thenkhatin an campaign-naa mi thenkhat an thlem dan chu Mizoram People’s Forum (MPF)-in ngaihven se a duh thu a sawi.
ZPM Tuichang North Block-in Zaingen Branch YMA Hall, Khawzawla mi thar lawm luh inkhawm an buatsaih hmanpuitu ZPM leader chuan party dangten ZPM chu puk chawpa campaign angin sawi thin mah se, SASCI sum puk hmanga campaign mek party-te pawh an awm tih a sawi a. Tun laia party thenkhatten mi thenkhat an thlem dan chu MPF-ten ngaihven se a duh thu sawiin, “Hetianga sum leh pai tam tak hmanga inthlemna hi MPF duh loh zawng tak a ni a. Hma lak a tul a ni,” a ti.
Mizoram rorelnaa Pathian ram tun din chu ZPM thil tum pakhatna a nih thu sawiin Lalduhoma chuan, “Pathian thuin min zirtir chu van lam nun ringawt ni lovin, he khawvela Pathian ram tun din leh a duh dana dik taka rorel leh sorkar dik siam hi a ni,” a ti.
Kohhran leh NGO ten social front an din thin, thenkhat chuan heng social front-te hi an sawisel thin a, ram leh khawtlang siam that nana kohhran leh khawtlangin an din a nih thu a sawiin, “Kan ram leh khawtlang hian din thar a ngai a; chuvangin, kan lo sorkar a nih chuan Mizoramah Pathian ram tun din hi kan tum dawn a ni,” ZPM leader hian a ti bawk.
Mi thar lawm luh inkhawmah hian Tuichang bial ZPM MLA candidate W. Chhuanawma pawhin thu a sawi bawk.