Italy in manager Luciano Spalletti hnuaiah mahni mual a inkhelah beiseina sang tak nei turin bul an tan a. Ukraine lakah 2-1 a hnehna changin Euro 2024 qualifying Group C atangin tling thei turin beiseina an la nei.
Serie A a Napoli champion puitu coach Spalletti hnuaiah hian Inrinni khan North Macedonia nen 1-1 a inhnehtawkin bul an tan a, away inkhelah point khat an hawn.
Tun tumah San Siro-ah inkhelin Azzurri tan midfielder beiseiawm Davide Frattesi chuan goal hnih a khung.
Spalletti hnuaiah Italy in midfield-ah Nicolo Barella, Manuel Locatelli leh Frattesi te bul an tan tir a. Tlarhmaah veilamah Mattia Zacagni awmin Giacomo Raspadori chu Nicolo Zaniolo nen an thlawp.
Minute 12-naah Zaccagni-a’n veilam atang ball lalutin Frattesi pet goal tur a siamsak a. Italy an nung.
Minute 29-naah Inter Milan midfielder in an goal hnihna khung lehnghalin Azzurri in goal hnihin hma an hruai a. Halftime hma in Ukraine in Andriy Yarmolenko hmangin goal khat an khung a, a bak erawh an khung belh thei lo.
Spalletti chuan, “Tunhnaiah kan team in beiseina phurrit kan phur hnem a, team ka enkawl tan atangin thil tam tak ka hriatthiam nghal thuai a ngai.”
“Kan result-ah kan lawm a, a chhan chu kan team hmachhawn lakah hian ball tha han vawrh luh pawh a har thin chang a tam hle.” tiin a sawi.
Inkhel dangah Spain in an rawlthar beiseiawm Lamine Yamal chu kum 16 leh ni 61 chauh a upa niin an ram chanchin a Spain tana bul tan thei naupang ber record an siam tir a. Cyprus hmachhawn turin 6-0 in an hneh.
Spain hian first half-ah Gavi leh Mikel Merino hmangin goal an khung a, second half-ah Ferran Torres chuan goal hnih khungin Joselu leh Alex Baena ten goal dang an khung ve leh bawk a ni.