Hun pawimawhah India fast bowler-te an che a, Sri Lanka lakah hnehsawh taka ball vawmin run 41 in Men in Blue in hnehna an chang.
Sri Lanka hi One Day International inkhelah a zawna vawi 13 chak lai an ni a, tunlai ODI team che tha ber pawl an ni.
Colombo a R. Premadasa Stadium a inkhelah pitch chu spinner te tana vawm nawmna a ni a. Hei hi India in an vuak laiin lang chiang hle in a vawikhatna atan ODI inkhelah spinner lakah wicket 10 an hloh.
India hian vuak hmasak thlangin over 49.1 ah an out zova, run 214 an siam.
India tan Rohit Sharma chuan run 53 a siam a, Ishan Kishan leh KL Rahul ten 33 leh 39 thawh bawkin anni pathum hi a siam hnem zual an ni.
Sri Lanka left-arm spinner Dunith Wellalage chuan wicket nga a la a, off-spinner Charith Asalanka nen India top order leh middle order thiattu an ni.
Sri Lanka tan chak beisei ngamna target a ni a, chetsual theih a ni tih erawh an hria.
A hun takah India bowler-te an che a, Jasprit Bumrah leh Mohammed Siraj ten spinner ten ball an vawm ve hma in Sri Lanka batsman tha pathum wicket an la.
Chutah tun tournament a che tha spinner Kuldeep Yadav chuan wicket pawimawh pahnih a la a. Sri Lanka tan Wellalage(42) leh Dhananjaya de Silva (41) ten beiseina siamin ball 82 atang run 52 chauh mamawhah an dah hman.
Mahse Yadav leh Ravindra Jadeja te che tha bawkin over 41.3 ah India in Sri Lanka run 172-ah an vawm out zo.
India hian naktukah Bangladesh an la tum dawn a, final-ah Sri Lanka leh Pakistan inkhel a chak zawk an hmachhawn ang.