An manager an ban hnuah Germany an chak nghal a. France nen inkhelin 2-1 in an hneh.
Germany hian manager Hansi Flick chu Inrinni zana Japan laka an tlawm hnuah an ban a, an manager hlui, team director ni mek Rudi Voller hnuaiah France hi friendly inkhelah an hmachhawn.
Signal Iduna Park a inkhelah hian Bayern Munich forward pahnih Thomas Muller leh Leroy Sane ten goal an khung a. France tan huntawp hma in Antoine Griezmann chuan penalty atangin goal khat a khung.
France hi nikum December a 2022 World Cup final a Argentina laka penalty a an tlawm hnua an tlawm leh hmasak ber a ni a. Hetihlai hian Germany hi kuminah vawi sarih inkhel hmachhawn tawhin vawi hnih an chakna chauh a ni.
Nakkum Euro thleng tur an nih avangin qualifying an khelh a ngai lova, hei vang hian kuminah friendly inkhel chauh an hmachhawn a ni.
Inkhel dangah England in an thenawm Scotland lakah hnehna an chang a, 3-1 in an hneh.
Hampden Park a inkhelah nidang ang thovin England leh Scotland boruak a sang a. Minute 32-naah Phil Foden-a’n England goal a khung hnuah pawh Three Lions inkhel a la nghet lo. Mahse minute thum hnuah Jude Bellingham chuan a khung belh a, England an inringtawk sawt.
Second half-ah Harry Kane-a’n an lamah Andy Robertson ball cross a tlawh lut a, Scotland in goal neiin phur sawt mahse tunlaia midfielder che tha ber pawl Bellingham-a’n Harry Kane goal khung tur siamsak lehin England an an phu zawk ang ngeiin hnehna an chang.