Brazil in 2026 World Cup qualifying-ah match hnih atangin vawi hnih hnehna an chang a, Peru laka chak tur erawhin huntawp dawnah goal an khung hram.
Nilaini zinga Estadio Nacional de Lima a inkhelah hian Brazil in huntawp dawnah defender Marwquinhos hmangin goal an khung a, 1-0 in anmahni mikhualtu Peru an hneh.
Brazil hian kar hmasa khan Bolivia 5-1 in an sawp tawh a, CONMEBOL qualifying-ah point ruk hmu in Argentina nen an sang ber mek.
Interim coach Fernando Diniz-a pawlte hian inkhelah ball chang tam zawkin an khingpuite an thunun zawk a. First half-ah goal hlauhawm vawi engemaw zat siamin Raphinha leh Richarlison ten goal an khung chu offside avanga pawmsak an ni lo.
Peru in an mikhualte lakah bet zawk mahse an chelh tluan thei dawn nia a lan laiin Paris St Germain defender Marquinhos chuan Neymar-a corner a tauh lut a, a ram a chakpui.
Diniz chuan inkhel zawhah, “Inkhel pahnih atanga kan thil hmuhah ka lung a awi. Tun tum inkhel chu a boruak a dang a, goal thum kan khung zingah pakhat chauh pawm a ni.”
“Chak a pawimawh a, kan chak danin fak a phu in ka hria. Belem leh helai hmuna kan inbuatsaihnaah set piece kan zir nasa a, inkhel tidanglam thei niin tun tumah pawh kan chak chhan a ni.” a ti.
Argentina in captain Lionel Messi chu chawlh hahdamna hun pe mahse chak turin harsatna an nei lova, Bolivia 3-0 in an hneh.
Estadio Hernando Siles ah Angel Di Maria chuan Messi-a captain armband hrengin a team hmahruaitu a ni a, assist vawi hnih neiin an chakna chhan lian tak a ni.
Minute 31-naah Enzo Fernández goal khung tur a siamsak a, halftime hma in a freekick atangin Nicolas Tagliafico chuan an goal hnihna a tauh lut.
Second half-ah Nicolas Gonzalez chuan an goal thumna a khung ve leh bawk a ni.
Bolivia hian halftime hma deuhin Roberto Fernandez chu red card avangin an chan ve thung.
“Game hnih atanga point ruk hmuh hi kan hmalam hun thlirin a pawimawh dawn tih hre sa in kan khel.” tiin Di Maria chuan an chak hnuah a sawi.