Aizawl: BJP Mizoramin MPCC President Lalsawta chu thu dik tawk lo hmanga BJP bei fo-ah an puh.
Nimina thuchhuah an siamah BJP Mizoram chuan Congress hruaitu, Rahul Gandhi-a’n Paris khawpuiah, ‘BJP-te chet dan leh Hindu sakhua chuan engmah inlaichinna leh inzawmna an nei lo; Gita ka chhiar tawh a; Upanishad hi vawi tam ka lo chhiar tawh bawk a; BJP thiltih danah hian Hinduism leh Hindu-na engmah a awm lo tak zet zet a; BJP-te Hindu nationalist-a puhna hi thu phuahchawp, thu belhchian dawl lo leh BJP-te hi Hindu nationalist anga puhna hi thu dik lo a ni a. BJP leh Hinduism hian engmah inzawmna a nei lo,’ tia a khawvel hriata a puan chhuah mek laia mipui bum tuma BJP an beihna hi Mizoram Congress hian bânsan a, Mizoram hmasawnna hna thawh tur ruahmanna an nei a nih chuan chutiang hmanga party dang bei zawk turin an chah tih an tar lang.
BJP hnathawh that hi Mizoram ngei pawhin a takin an chang mek nia tar langin BJP Mizoram chuan, “MPCC president hian BJP leh Pu Modi-a hi a fak hreh a ni pawhin central-a an hotupa, Pu Rahul Gandhi thusawi atang tal hi chuan harh chhuak hram se tih hi BJP Mizoram chuan kan beiseina a ni,” an ti.
MPCC president leh a hote hian an sakhua an tuipui tak zet a nih chuan politics khelhna atan mai hmang lovin India rama chanchin tha la hre lo zaa 98 hnenah chanchin tha hrilhna lam hnathawk lawk se tiin Mizoram Congress party hian mipui bum hi duhtawk tawh se, Mizoram hmangaihna tak tak nen ram politics vei ve tawh turin an chah tih an tar lang bawk.