National Highway 302, Lunglei leh Tlabung inkar kawng chu lirthei zawh hleih theih loha a chhiat avanga Tlabungah ni tin ei chawp thil a vâng tan a, mipui an tam loh nan mipui mamawh phur tur lirthei sorkarin a ruahman.
Tlabung atanga thudawn danin Tlabung khuaah hian lirthei a luh mumal theih tawh loh avangin alu, dal, purun leh tel bakah mamawh zualpui dang lei tur a awm tawh lo tan a, mipuite harsatna tawh hi sutkian a nih theihna turin Lunglei Bawrhsap Ramdinliani leh NHIDCL hotuten BRN Infrastructures Pvt. Ltd lirthei chu Tlabunga mipui mamawh phur turin an tlantir.
Tun hmain Tlabung atanga km 95 vela hla Lunglei thleng turin darkar ngate tlan a ngaih tlangpui laiin tun dinhmunah chuan a kaltluang pawl pawhin darkar 24 chuang an hmang a, tun tuma Tlabung mipuite mamawh phurtu lirtheite pawh hian Zirtawpni khan Lunglei chhuahsan mah se Pathianni khan Tlabung an lut thei chauh a ni.
Lunglei atanga Tlabung panna kawng hi lirthei tana zawh harsa khawpa a diak leh nal avangin tun dinhmunah lirthei zawng zawng tih theih deuhthaw an tlan ngam tawh lo a, khualzin phur maxi cab phei chu kumin July 24 atang khan tlan mumal tawh lo tanin service pangngai an titawp reng tawh a ni.
Hetih lai hian tuna National Highway 302 dinhmun chu lirtheiin a zawh hleih theih meuh loh avangin khualzin veivakten Tlabung an tlawh ngai meuh tawh lo a, Tlabunga khualzin thlenna hmun hrang hrang chu hun rei tak chhung a ruak tawh bawk.
Mizoram chhungah Tlabung hi hmun danga mite tlawh nasat leh zin ngunna pawl a nih avangin Tlabunga mikhual thlenna hmun hrang hrang pawh a lun ve thei hle thin a; nimahsela, kawng a chhiat lehzual tan hun, August thla atang vel khan hmun dang atanga tlawhtu an awm tak loh avangin Tlabunga khualzin thlenna hmun hrang hrang – tourist lodge, PWD IB leh Forest Rest House-ah hun rei tak chhung mikhual thleng tur an awm mumal tawh lo a ni.
Lunglei atanga Tlabung panna National Highway 302 hi Sorkar laipuia Ministry of Road, Transport & Highway sum hmangin Bharatmala Pariyojana hnuaiah sial zauha laih that mek a ni a; nimahsela, he kawng sial zo tura hun ruahman a ral hnuah pawh chhan hrang hrang vangin hnathawh tur za zela 17 (17%) vel bak zawh a la ni lo a ni.