India Prime Minister Narendra Modi chu 17th September 1950 khan a lo piang a. He a piancham kum 73na lawm nan India ram pumah kuhhnathawktute tana hamthatna scheme tura an duan Vishwakarma scheme chu tlangzarh a ni. He scheme hnuaiah hian kutthemthiamna lama eizawng ten hma an sawn lehzual theihna tura tanpuina pawisa Rs 13000 – 15000 crore lai ruahman a ni a. Hetiang lama tui mite tan chuan thu lawmawm a tling ngeiin a rinawm.
Hetih rual hian Bjp sawrkar hian ni pawimawh tia phuahchawp titih deuh bik, sakhaw dangte ni serh hi an hun hman nan hian an thlang chat chat mai a. Modi birthday a he scheme an hawn pawh hi kristiante chawlhni ah kher an han hmang a ni a. Kristiante ni pawimawh bawhchhiat hi Bjp sawrkar hian a tum lui hrim hrim emaw ni chu aw tih theih turin kum 2014 khan India prime minister hlui Atal Behari Vajpayee piancham 25th December chu Good governance day ah puangin an lo hmang tawh a. Kristiante nek chepna ti chiah silova an ni pawimawh sawrkarin a han bawhchhe lui chat chat zel hi chu tihpalh thil leh thil intawng satliah nilovin, ruahmanna fel tak nena tum luih ani hmel thin khawp mai.
Vishwakarma scheme hawn hun an han ruahman dan hi chu kristianna nen chuan thil inhmeh lo leh lawmawm lo tak a ni. Kan state hi state rethei tak kan ni a. Hetiang central scheme hi kan ram kuthnathawktute mamawh tak pawh a ni a. Mahse, kan sakhuana ni pawimawh nena buk dawn chuan eng ang pawisa pawh hian a buk thlu zo lo kan ti ngei ang. Mahse, kan mamwhna lai hi hria in kan state sawrkar hian kan ramah chuan a hawnna hi a remchang ve rih love an ti phal lo ani hmel a. Kawng lehlama ngaihtuah chuan kan sakhuana hi hmasawnna sum hmuh nan kan phatsan pawh a tih theih awm e. India ram roreltu bjp sawrkar zia chu kan hre vek a. Kristiante leh sakhaw dang nekchep a, zawi zawia chimral tum reng an ni a. He an thil tum hi hmanhmawh hauh lo hian a takin an kalpui reng a. Sawisel remchang chiah silo hian, an thuneihna hmang hian min bei reng a ni.
Hetiang hi bjp sawrkar kalphung anih avang hian an lakah englai pawha inven reng hi a ngai tawh a. Kan sakhua, kan hnamzia zawng zawng humhalh a, mizo kan nihna tungding chho zel tura huaisen taka kan chet a ngaih chang a awm thin a, a la awm dawn chauh pawh a ni ang. Kan state sawrkar hian remchang lo a tih ngam chang hi a awm ve a ngai thin a. An duh ang thala Yes sir tih reng chuan min nekna hi a zualkai tial tial dawn a. Kan hnam nun leh kristianna hi kan phuarzawm tlat tawh a. Kan kristianna a reh tial tial hian kan hnam nun pawh a dal riai riai dawn bawk. Hei hi kan hriatchian a ngai khawp mai. Barh luih thil hi kan la tawng dawn chauh ang. An sum leh scheme it vanga kan bawh huam huamna chuan min la eiral thei a. Khawvelah hetiang hian hnam tam tak an lo ral tawh thin tih hria ila. Ral loh kan tum chuan vairam atanga a chawchah an rawn ken hi i ban thuai thuai lo ang u. Hnawl ngam chin neih hi a ngai tih hre reng bawk ila. An programme leh scheme nazawng lakah i fimkhur ang u.