Afghanistan khawchhak lama Jalalabad khawpuiah leh an khawpui ber, Kabul-a bomb puakah mi pasarih an thi a, mi 30 velin hliam an tuar bawk niin Taliban chuan Al Jazeera an hrilh.
Inrinnia thil thleng kha niin improvised explosive device nia hriat a ni.
“Jalalabad leh Kabul-a puakte hi ISIL-K la bângte tih ni ngeiin a lang,” tiin Taliban chuan an sawi a. Islamic State in Khorasan Province tihna niin ISKP (ISIS-K) tihna a ni a. Taliban chuan he thil thleng hi chhui zuiin a titu chu hremna an pe ngei dawn tih an sawi.
News agency thenkhat chuan thil thleng hmutu leh venhim hna thawktute hnen atangin Nangarhar province khawpuia bomb puak zawk hi pali vel niin an sawi.
“Jalalabad khawpuia thil thlengah hian mi tam tak an inrawlh a, man pawh an awm tawh a, chhui zui mek a ni a. An chhui chhuah hi nakinah chiang zawka la puan a ni ang,” tiin Taliban chuan an sawi.
A titua inchhal erawh tumah an la awm lo va. Jalalabad hi Nangarhar province khawpui niin ISKP tamna a ni.
Jalalabad-a bomb puahna hmun hi pick-up truck hring, Taliban flag tarna bulah ralthuam keng mi eng emaw zatin an thlithlai lai thlalak hmuh tur pawh a awm.
“Hmun pakhat bikah chuan Taliban lirthei chu tum a ni,” tiin Taliban thuneitu pakhat chuan AFP news agency a hrilh.
Hliam tuar zingah hian hmeichhia leh naupangte pawh an tel niin a sawi bawk.
Kabul-a bomb puak hi Dasht-e-Barchi venga mi a ni ve thung a, car-a phurh tihpuah a ni a. Thi an awm lo va, hliam tuar erawh mi pathum an awm thung.
Taliban-in ro an rel hnua tun hi beihna lian hmasa ber a ni.