Aam Aadmi Party chuan nakuma Uttarakhand-a assembly inthlan lo awm turah campaign tanin an tling a nih chuan hna nei lote hnenah puihna (unemployment allowance) pek leh state mite tan hna awm 80% hauhsak an tiam.
AAP hotupa, Delhi Chief Minister Arvind Kejriwal chuan Uttarakhand-a tlawh tumin an intiamna hi a sawi a. Delhi chauhva la lian ni mah se ram pum huapa intihlen dan an dap mek zel, state inthlan apiangah chuh ve zel an tum.
Kejriwal-a chuan chhungkaw tina hna nei lote chu hna an neih hma thla tin Rs. 5,000 pek a tiam a. Hna nuai khat tal siam a tiam bawk.
“Mi dangte ang lo takin kan sawi chu kan ti mai thin a. Kan intiamna hi lo vawng tlat rawh u. Lo neitute hnenah nileng zankhuaa a thlawna power pek kan tiam emaw, unit 300 chin a thlawna pek kan tiam emaw a nih pawhin kan ti mai. Delhi-ah pawh kan ti tawh a, hetah pawh kan ti mai dawn a ni,” a ti.
Mi mal leh sorkar pisaa hna reng rengah Uttarakhand mite tan 80% hauhsak a tiam bawk a. Hna nei lote vila hna pek dan ngaihtuahtu tur leh pem lut bikte vil tur ministry hran din a tiam bawk.
“Uttarakhand-a sorkar kal tawhte khan thil tha an kalsan a, ram hausakna an rawk a ni,” tiin Kejriwal chuan a sawi.
“Delhi-a kum 2015-a kan sorkar khan mipuite hnena kan intiamte tihhlawhtling turin khawia mi nge pawisa awm ang tih kha zawhna a ni a; mahse, kum li chhungin budget sum kan hman bângte kha tangkai taka hman a ni a. Ei rukna kan hnawt bo va, a bak chu a fel mai a ni,” a ti.