Aizawl : School Education Minister Lalchhandama Ralte-in nimin khan Govt. Thingsat Primary School Diamond Jubilee lawmna leh Govt. Sakawrdai Middle School Golden Jubilee lawmna a hmanpui.
Govt. Primary School, Thingsat Diamond Jubilee lawmnaah Education Minister chuan kum 60 chhungin Govt Primary School Thingsat-in fa duhawm tak tak a lo hrin tawh thu hriatin hlimawm a tih thu a sawi a. Zirlaite chu taima leh tumruha an zir chuan Thingsat atangin mihlawhtling an ni thei tih zir chhuak hlawhtlingte chuan an lantir tih a sawi.
Zirna pawimawh zia sawiin, Lalchhandama Ralte chuan khawtlang hruaitute leh zirtirtute chu hmasawnna leh khawtlang than nan zirna chu a kipui a ni tih hre thar leh turin a chah a. Zirtirtute pawh zirna sikul neitu thinlung pu an nih a tul thu sawiin, hun vawng dik leh sikula awm tha an nih a pawimawh avangin tunhnaia zirtirtu lakah a theih chin chinah a khaw mi te lak tum zel a nih thu a sawi.
Lalchhandama Ralte chuan zirna in leh compound chu khawtlang rohlu a ni tih hriaa humhalh tha turin khawtlang hruaitute leh nu leh pate pawh a sawm a. Zirtirtute pawh missionary thinlung pua naupangte hmangaihna nena thawk tur leh hun vawng dika, faina vawng tha turin a chah a. Diamond Jubilee lungphun a hawng nghal bawk.
Govt. Thingsat Primary School hi kum 1963 a din niin, zirtirtu 9 leh zirlai 40 an awm mek a ni.
Govt. Sakawrdai Middle School Golden Jubilee lawmna Sakawrdai Middle School tualzawla neihah pawh thusawiin, School Education Minister chuan zirna ngaisang apiang khaw hmasawn an nih thu a sawi a. Zirna chuan khawtlang nunah a lailum a luah a ngai tih sawiin, “he jubilee hi zirna hi mihring inchherna hmunpui a ni a, naupang sei lian hian rahbi dik an rah a ngai tih min hrilh hretuah ṭang se ka duh a ni” a ti.
Mizorama mihlawh- tlingte thingtlang aṭanga chhuak tam tak an awm thu sawiin, Lalchhandama Ralte chuan tai- makna, huaisenna leh tumruhna nen an zir phawt chuan fa hrin manhla an ni thei tih hre turin zirlaite a fuih bawk.
School Education Minister hian Golden Jubilee lungphun hawngin, Souvenir a tlangzarh bawk a ni.