Aizawl: Faina beihpui thlakna, Swachhata Hi Seva 2023 chu nimin khan Deputy Chief Minister Tawnluia’n a hawng a, October 2 thleng hman tur a ni.
Swachhata Hi Seva hawnna inkhawm hi Mizoram Rural Bank (MRB) Auditorium, MINECO Aizawl-ah neih a ni a, khuallian Tawnluia chuan faina pawimawhzia hriain India hnam pa, Mahatma Gandhi-a piancham hriatreng nan hetiang programme hi hman a nih thu a sawi.
Tawnluia chuan pawn lera inthiar awmlohna lama UD&PA leh PHE hnathawh chu lawmawm a tih thu sawiin, tunhnaiah Aizawl Solid Waste Management Centre SIPMIU enkawl thin chu, AMC-in a enkawlna kawngah mawhphurhna alak tak avangin an zangkhai phah hle tih te, Mizoram state pum pui ODF a nih theih nan tha leh zung sengtute zawng zawng chungah lawmthu a sawi a. PHE hmalakna avanga Mamit District ODF Plus District awmchhun a ni thei chu a lawmpui tak zet thu a sawi bawk.
Mizoram state tana faina beihpui thlakna hawnna inkhawm hi Lalmalsawma Pachuau, Secretary, UD&PA-in a kaihruai a, Dr. Andrew H. Vanlaldika, Director, UD&PA chuan Swachhata Hi Seva chuan faina hi rawngbawlna tih thupui hmangin thu a sawi a, kumin faina hapta thupui chu Garbage Free India (Bawlhhlawh awm lo India) tih a ni.
Inkhawmah hian SHS & ISL Volunteers leh Safai-mitras (thian faitute) chawimawina hun hman nghal a ni a, Govt. Hrangbana College, Govt. Aizawl College, Govt. Johnson College, Mission Veng Youth Adventure Club, Pachhunga University College leh Govt. Zirtiri Residential Science College naupangten September 15 leh 16 a cleanliness drive an neih lawmpui nan pawisa fai leh chawimawina certificate hlan an ni bawk.