English winger Callum Hudson-Odoi chuan Nottingham Forest tana a inkhel hmasa berah goal pawimawh a khung a, Burnley laka an si phurh sutin 1-1 in an inhnehtawk.
Thawhtanni zanah The City Ground-ah Forest in Burnley an mikhual a, mikhual team hian ‘possesion football’ khelin inkhel an thunun tha zawk.
Halftime hma deuh a Zeki Amdouni goal khung hmanga hma an hruaina chu an hum tluan thei dawn a ang hman viau a. An goal khungna kawngah rawlthar beiseiawm Lucas Koleosho a fakawm.
Swiss striker Amdouni hian ni 20 kalta khan League Cup-ah Forest an hnehna turin chakna goal a khung tawh a. Goal a khung hma hian a goal khung ngei tur nia lang chu Forest goalkeeper Matt Turner chuan a dansak bawk.
Mahse Forest in tun nipui bazar inkhar ni a an lakluh Hudon-Odoi-a’n second half-ah penalty area hmawr atangin an si phurh sutna goal a pet lut mawi hle.
Vincent Kompany-a pawlte hian chance tha siam thei zawkin huntawp hma minute 12 a la awmin chakna goal an khung niin an ngai a. Lyle Foster chuan penalty area chhungah remchang neiin goal a khung a, mahse Sander Berge handball avangin goal an pawm lo.
Huntawp dawnah Foster hian tul lo taka Ryan Yates a nghawk luih avangin hnawhchhuah a ni leh bawk.
“He league-ah hi chuan point khat pawh hmu turin beih fe tak tak a ngai a, mahse tuna kan inkhelh tawh chinah kan el tawk viau tur team engemaw zat an awm tih a hriat theih.” tiin Kompany chuan a sawi a. “Kan duh ang thlap a khelh kan la nei lova, mahse vawiinah pawh kan inkhel a chhe lo hle.” tiin a team a fak bawk.
Nottingham Forest head coach Steve Cooper chuan an team in hma a sawn thu a sawi ve bawk a, “Nikumah thil tam tak kan zir a, tunah kan squad in hma a sawn a, kan inkhelhdan pawh tihdanglam fo a theih tawh.” a ti.