US Secret Service chuan an ram sanaa nimin tuk (India sanaa nimin tlai lam) khan President hlui Barack Obama leh Secretary of State hlui, Hillary Clinton-i chenna inah thil fun, a chhunga puak thei thil awm an hmuh thu an sawi.
Secret Service hian Manhattan hmar lam daia Westchester-a Clinton-i chenna inah Thawhlehni khan thil fun hi an hmu a. Nimin tuk khan Washington-a Obama chenna inah pawh hetiang bawk hi an hmu leh tih an sawi a ni.
“Heng thil funte hi tih dan thin pangngai angin puak thei thil a ni em tih ngun taka en leh a ni a, rin ang ngeiin a lo ni ngei bawk,” tiin Secret Service chuan thuchhuah siamin an sawi.
“An mi thawnte tak hian an dawng hman lo va, dawn tum ang pawhin an awm bawk lo,” an ti bawk.
President Obama hun laiin Clinton hi Secretary of State a ni a. President Bill Clinton-a nupui a ni a, inthlan hnuhnung ber khan Donald Trump nen President nih inchuhin an inkhing bawk.