Khasi art & communications consultant, Mary Therese Kurkalang chuan ni li liam ta khan naupan laiin Shillong-a Catholic kohhran pakhat, Congregation of Christian Brothers-a thawk pahnihin mipat hmeichhiatna rawngkaiin an khawih tih thu a post chu kohhran hian chhui chian a ni dawn tih an puang.
“Christian Brothers chuan Facebook kaltlanga #metoo movement hmanga puhna awm hi a chhui zui dawn a ni,” tiin an kohhrana Brother J.Johnson, Society Protection officer, Professional Ethics Commission of the community chuan a sawi a. “Christian Brothers hi mipat hmeichhiatna rawngkaia khawihte dikna chanvo chungchangah hian a tangrual tlat a. A puhtu leh a puhte hi ngun taka kawmin kan Protection Policy — ‘Safeguarding Children & Vulnerable Adults’ hnuaiah kan en zui dawn a ni,” a ti.
Kurkalang hian Christian Brothers-a mi leh he kohhran hnuai thova zirna in pakhat, Don Bosco-a an Salesian zinga miin an khawih niin a sawi a. Hetih hun lai hi kum nga chauh a nih lai, kum 1980 vel niin a sawi bawk.
Kurkalang hian hetiang thil a tawn avang hian a hnuah damdawi ina a awm laiin vawi hnih lai intihhlum a tum phah niin a sawi bawk.
Kum 2012 khan Kurkalang hian tuna a company hi a din a. A company hi arts, publishing leh social development lama thiltihkhawm huaihawttu a ni.
Chanchinbu miten an biaknaah Kurkalang hian Facebook-a a thu post bak chu sawi belh tur a nei lo tih a sawi a. Don Bosco lam pawhin an hnuaia thawk a puhnaah hian sawi engmah an la nei lo bawk.