- Ruata
Royal Enfield adventure bike hmingthang Himalayan chu a thar, 450 tichhuak turin company lam an in ruahman mek a, an phochhuak tep tawh niin media report hrang hrangin an tarlang tawh a. Lei theih tura tlangzarh fel erawh kumin November thla beisei a ni.
India ramah hian tunhnaiah adventure bike hoin lei an hlawh chhoin a lar chho khawp mai a. Lirthei ke hnih nei siamtu company hrang hrang te hian India ram chhungah hian adventure bike an tichhuak deuh vek tawh a, India rama kan hmuh tam zawk hi 500cc hnuailam adventure bike a ni tlangpui.
Heng bakah hian a man to leh man sang, khawvel huapa adventure bike tha ho pawh kan hmu nual tho a. A lar zual leh hralh tam erawh 500cc hnuailam, India rama company awm sa lar tak tak te tihchhuah a ni a tih theih awm e. Heng lar zual ho zinga a khawl lian zual leh bike pawh lian zual zingah Himalayan hi a awm a. Tunah hian a thar an tihchhuah tur hi chu thawm a awm nasa tawh a, khawlai leh India ram hmun chhengchhe tak taka an enchhin lai pawh hmuh tur a awm nual tawh a ni.
- Kan hriat theih chin
Royal Enfield Himalayan 450 hi a chanchin kimchang engmah tihchhuah a la ni lo a. Hetihrual hian hriat theih nel nual chu media report hrang hrang atangin a awm tawh a. Hei aia chiang leh kimchang hian company lam atangin kan hre thuai tawh dawn a ni. Information darh mek atang chuan Himalayan thar tur hian khawl thar hlak 451.65cc liquid cooled khawl a hmang dawn a. He khawl hian 40PS power a pechhuak thei dawn a, hei bakah hian 40 atanga 45 inkar N, torque a pechhuak thei dawn bawk a ni. Kg 210 vela rit tura beisie a ni a, kg 180 a phur thei dawn a, a wheelbase hi 1510mm vel a ni dawn bawk a ni.
A elpui rual deuh adventure bike dang KTM 390 Adventure aiin Himalayan thar hi 3PS vel lekin a power figure a hniam hret dawn a, hetihlai hian a wheelbase erawh a thui hret zawk dawn thung a. Himalayan thar hian a ke hmalamah 21 inch wheel a nei ang a, a hnungah 19 inch a nei thung dawn a ni. A hnung leh hmaah disc brake a hmang leh ang a, dual channel ABS chu duhthlan theih tur a awm dawn bawk a. Ride by wire technology a neih dawn bakah suspension lamah a hmalamah upside down fork a nei ang a, a hnunglam monoshock a ni thung dawn a ni.
A hmanraw changkang kentel tur hrang hrang zingah hian fully digital instrument cluster, Bluetooth navigation, round headlight, all-LED lighting, dual LED indicators, brake signal, triple-in-one taillamp te a tel a. Royal Enfield hian accessories hrang hrang lei belh tur a duang leh dawn bawk a, heng zingah hian a seat duhthlan tur hrang hrang bakah mirrors, crash guard, handlebar guard, footpeg, luggage seat leh thil dang dang duhthlan tur a awm nual dawn a. A accessories hrang hrang te nen chuan khawl thar a hman tur zawng zawng nen adventure biking lama tui te tan chuan bike nghahhlelhawm tak a ni dawn a ni.
A man tur lamah chuan Rs. Nuai 2.8 man (ex-showroom) atangin a intan hmel a. A elpui tur hrang hrangte chu adventure dang KTM 390 Adventure, BMW G310 GS, leh Hero atanga lo chhuak har tawh lo tur Hero XPulse 400 te a ni dawn a. Adventure bike te zawk hrang hrang nen pawh kawng hrang hrangin a inel thei awm e.