Italian Mafia boss, kumin kum tira man a nih hma zawnga an sorkarin mi an man duh ber zinga pakhat, Matteo Messina Denaro chu a thi.
Kum 61 mi hi pawl rawng tak, Cosa Nostra Mafia hotupa nia hriat niin January-a man a nih hma khan kum 30 vel zet man tuma zawn a ni.
Man a nih lai hian cancer natna neiin a inenkawl lai a ni a, thla hmasa khan lung in atangin damdawi inah dah a ni nghe nghe.
Denaro-a hi mi thahna tam takah a mawhphurtu nia ngaih a ni.
Kum 1992-a anti-Mafia prosecutor pahnih, Giovanni Falcone leh Paolo Borsellino te thihna avangin kum 2002 khan amah awm lo mah se a chungthu relin dam chhung lung in tang tura tih a lo ni tawh.
Cosa Nostra-in huang hrang hranga pawi an khawihna – mi bum, dan lova bawlhhlawh tihral, mi pawisa chhuh luh leh ruihhlo tawlhah a kaihhruaihna hnuaia chet lak a ni.
Kum 1993 atang khan a awmna chin hriat a ni lo va, a awm hmun sawnin a awmna apiang atangin a hotute chu thupek a pe mai thin nia hriat a ni.
Tual chhung chanchinbute chuan damdawia enkawl tumna a duh loh hnuah Zirtawpni khan Italy lailia L’Aquila khawpui damdawi inah nikhawhrelovin a awm tan niin an tar lang.
Tun hnaiah a cancer vang hian zai a ni a, an zai hnuhnung ber atangin a la dam fel lo nia sawi a ni.
L’Aquila Mayor Pierluigi Biondi pawhin Denaro-a a thih thu hi nemnghetin X-ah a tar lang tawh.
A pawikhawihna hrang hrang bakah hian Denaro-a hi Cosa Nostra pawl ‘thuruk vawngtu’ hnuhnung ber nia hriat a ni a. A chungchang hre deuh leh prosecutor-te chuan Mafia-in pawi an khawihnaa liana inhnamhnawihte hming eng emaw zat a hre ngei niin an hria.
January-a man a nih pawh khan ralthuam nena inthuam mi 100 chuang an thawk chhuak a, Sicily khawpui, Palermo-a mi mal damdawi ina chemotherapy a ti lai man a ni.
Sorkar thuneituten an pawl hmehmih tumin kum tam tak an bei a. A chhuitute chuan hnaih hret hretin Denaro-a hnaih deuhte an man thei ta a. Kum 2013 khan a farnu, Patrizia-i leh a lamtang hnai eng emaw zat an man.
Police hian amah nena inzawm sumdawnna pawh an man a, hengte hi khawih chet theih loh turin an ti zui.
A thlalak nia sawi a darh leh zauh thin a, police chuan kum tam a liam tawh avangin a hmel inthlak dan hriat tumin an bei nasa a. A aw phei chu kum 2021 hnu lamah hriat tur a awm tawh lo.
September, 2021 khan Netherlands-a Formula 1 intlaksiak entu pakhat chu thingpui dawra a chawl lai Denaro-a emaw tiin man hial a lo ni tawh a ni.