Lok Sabha inthlanpui lo awm tura Delhi-a Congress leh Aam Aadmi Party ten thawhho an tumah thutlukna mumal siam theih a la ni lo zel a. Delhi Congress chhunga inlungrual lohna a awm a, thutawp chu president Rahul Gandhi siam turin an dah tawp.
Delhi Congress president Sheila Dikshit leh an hruaitu dangten nimin khan AAP nena khawpui chhunga thawhho chungchang hi an sawi a; mahse, thutlukna an siam lo, party Gandhi thu anga kal an tum.
Meeting-ah hian ngaihdan inang lo a awm a, thenkhatin thawhho an duh laiin duh lo an awm bawk a, an thua tihtluk aiin Gandhi-a ngaihdan siam anga kal mai an rawt ta tih he meeting-a tel party hruaitu pakhat chuan a sawi.
Delhi Congress president hlui pali – Ajay Maken, Subhash Chopra, Tajdar Babar leh Arvinder Singh Lovely te chuan AAP thawhpui hi an duh nia sawi a ni a. AICC in-charge of Delhi Congress PC Chacko chuan district Congress 12-a president, party hruatu leh municipal corporation 3-a councilor ten AAP thawhpui an duh tih an ziahna lehkha chu Gandhi hnena thlen turin a keng tel bawk.
Delhi Congress president Sheila Dikshit leh working president 3 – Devender Yadav, Rajesh Lilothia leh Haroon Yusuf te chuan thawhpui hi an duh ve lo niin an sawi a ni.