Aizawl: Mahni nunna thapa mi dangte nunna chhanhimtu, mi huaisente hnena India ram sorkar laipuiin award a hlan thin, Jeevan Raksha Padak chu nimin khan Lawngtlai AOC Venga cheng, kum 88 mi, Khawlliana hnenah hlan a ni.
Lawngtlai DC Office Chambera hlanna inkhawmah hian DC H. Lalhmingthanga chuan Lawngtlai district atanga huaisen lawmman dawng thei an nei chu ropui a tih thu sawiin, “Kum upa tawh tak ni chunga mi dangte nunna chhanhim tura thawk chhuak, Khawlliana chu thangthar zawkte tana entawn tur hnutchhiahtu a ni,” tin a chhuang tak zet a, India president aiawhin he award hi a hlan tih a sawi bawk.
Huaisen lawmman hlannaah hian a dawngtu, Khawlliana chu stroke avanga a chet sawn hleihtheih loh avangin a aiawhin a fanuin award hi a dawng a, sorkar lam atangin Margaret J. Vanlalremmawii, SDO Sadar, Lawngtlai chuan Khawlliana- chanchin leh lawmman a dawn chhante a sawifiah a, chhungkaw lam aiawh leh AOC Veng khawtlang hruaitu te, VC leh YLA leh journalist-te atangin thusawi ngaihthlak a ni bawk.
October 27, 2021 zing lam dar 8:30 vel khan Lawngtlai AOC Veng chawmtu tranformer chu a chhiat avangin Lawngtlai P&E Deptt-a MR Terina chuan siam that tumin transformer-ah hian hna a thawk a, hetia hna a thawh lai hian transformer-ah chuan current kal thutin Terina chu current chuan a man ta a, transformer awmna thlang lawka khawsa, Khawlliana, kum 86 chuan lo hmuin an kawta mau tlawn ro tawh chu keng chhoin harsa takin Terina chu a hawlh tla a, a nunna chhanhim a ni ta a ni.