Aizawl: ZPM a sorkar a nih chuan kum nga chhunga power-a intodelh hman tumin lui pathum khuah tum an nei tih an party consultant F Rodingliana chuan a sawi.
Thawhtannia Ngopa Jubilee Hall-a ZPM 21st Lengteng A/C North Block Extended Meeting leh policy zirhona buatsaih a hmanpuinaah Lengteng biala ZPM candidate tur chuan ZPM-in power-a intodelh a ngai pawimawh a, a kum tela power mamawhna a san zel avangin Pathian leh mipui zara an sorkar chuan kum nga chhunga power-a intodelh tura hma lak tum a ni tih a sawi.
Tlawng Hydro Project 54 MW, Lungleng khaw bulah din tum a ni tih sawiin, he tuikhuah hmang hian pump chhawn ngai loin PHE tui pump-na, Dihmunzawl thleng gravity-in a haw thei a, heta tang hian pump hmangin Aizawl khawpui a thleng chho thei ang a, hei hian sum tam tak a hum dawn tih a sawi.
Mw 120 pe thei tur, Mat Sekawi, Rotlang khaw bulah leh MW 100 siam theihna, Tuivai Phase-I chu Ngopa khaw bulah din theih a ni tih a sawi bawk.
“Tunah hian kan ram chhunga luite atangin power siam theihna MW 3,663 chuang kan nei a, heti chung hian power-ah kan intodelh lo em em a, power lei nan kum tin Rs. vaibelchhe 389.93 vel kan hmang ral thin. Hei hi ZPM chuan tha ti loin kan ram chhunga luite hi power siamchhuahna atan a hmang turin hmalakna hmasaah kan nei dawn a ni,” F Rodingliana hian a ti.
ZPM a sorkar hunah chuan electric bill chu a rate tihpun a ni dawn lo tih a sawi lawk bawk.
ZPM a sorkar chuan zirna (education) leh hriselna (health) kalpui an tum dante a sawi a. A tul dan azirin voluntary retirement scheme pawh siam a ni dawn tih a sawi.
Mizoramin industry mumal an la nei lo chu hma lak a ngai tih ZPM consultant hian a sawi a. An sorkar chuan agriculture leh horticulture hmangin industry din an tum a, sawhthing sawngbawlna leh paper mill thlenga din an tum thu sawiin, “Hengah hian mi tam tak tan eizawnna siam tum a ni,” a ti.
An bial, Lengteng huam chhungah ZPM-in policy a duan hrang hrangte a tam thei ang ber seng luh tum a nih dawn bakah Mizoram budget piah lam, project liantham siamin central scheme hrang hrang atangin an bial mamawh tur central sum hai luh tura hma lak a ni dawn tih a sawi.
“Bial hmasawnna atan MLA fund leh SRDC fund chu mipui ta a nih angin bial mipui duh dan anga hman tum a ni,” tiin, SRDC Office pawh an bial chhungah dah turin hma lak a ni dawn tih a sawi a ni.
“Hetianga hma kan lak hunah chuan kalphung tharin kan kal tawh ang a, tun hma anga MLA leh minister-te chil per changa bial mipuite awm thinna hi tihreh tum a ni,” a ti.