BJP Mizoram Pradesh thupuangtu, Lalremsangi Fanai chuan Arab ram chhung hmun thenkhata awmpui hna leh a dangte thawk tura Mizo hmeichhe kal, harsatna tawk mi 11-te chu Mizoramah an haw tawh tih a sawi.
Nimina Aizawl Press Club-a chanchinbumite an kawmnaah Lalremsangi Fanai chuan Mizo hmeichhia, Arab ram (Middle East)-a in chhung hna thawk tura kal zinga harsatna tawk mi 11-te chu Mizoramah an haw tawh tih sawiin, heng mite hi agency kaltlanga Dubai-a tirh thlakte an ni tih te, Siaha, Lawngtlai leh Champhai district chhung mi leh sate an nih thu a sawi.
Tunah hian Mizoram pan mek pakhat a awm thu sawiin, haw leh tur Dubai, Oman, Syria leh Abu Dhabi-a India embassy-ah mi 14 vel an awm mek thu a sawi a ni.
Remsangi chuan ram danga hnathawk tura thawn, harsatna tawkte buaipui tura FIR an theh luh pawh ziah luh a ni tawh a, Mizoram sorkar pawhin hemi kawngah hian theihtawp a chhuah zel tih a sawi a; hetiang harsatna hi Mizo hmeichhiaten an tawh lohna tura nasa zawka hma la turin chief minister bakah sorkar hotu dangah ngenna an theh lut tawh tih a sawi.
BJP Mizoram thupuangtu chuan ram danga hnathawk tura tirhte hi an lo inhralh kual nasa hle tih an hmuh chhuah thu a sawi a, Dubai-ah hna thawkin an awm mai dawn emaw an intih laiin, Arab ram chhung hmun dangahte an hralh leh a, Syria-ah phei chuan agency-ten naupang pakhat chu US dollar 4,000-ten an lei a, inbumna nen inremnate ziah vek a ni thin tih a sawi a, hemi avang hian agency-te hian a thlawnin an ramah haw lehtir mai an rem ti ta lo a, sum tam tak an phut ta thin tih te, tuna hruai haw takte pawh agency-te chu vau ti tiha an ngen avanga haw theih chauh an nih thu a sawi.
Remsangi chuan, tun hnaiah parliament rorelna in hnih, Lok Sabha leh Rajya Sabha-ah Women Reservation Bill, 2023 pawm a ni ta chu lawmawm leh chhuanawm an tih thu a sawi bawk a, “India ram hmeichhiate tana za zela 33 seat zuahna tur bill pawimawh, ruling leh opposition party pawh sawi loa member zawng zawngte lungrualna hnuaia pass a ni leh opposition lamin a rang thei ang bera hman nghal an duhna hian a pawimawhzia leh pass a tulzia a tilang,” a ti bawk.