Aizawl: Aizawl khawpui tuilak tihpunna tur 37 Million Litre Per Day, Water Treatment- Plant chu nimin khan Laipuitlang a PHE Department tuizem lian kiangah Deputy chief minister Tawnluia’n a hawng.
Tawnluia chuan Aizawl Water Supply Scheme Phase one leh two aia tam, Aizawl hmar lam veng chawm bik tur hawn a ni thei ta chu lawmawm a tih zia a sawi a, Tuikhuahtlang atanga Aizawl hmar lama tui pek phei kher angai tawh lo ang a, nitin mitin hnenah tui litre 135 pek theih a ni tawh dawn tih a sawi a. Veng hrang hranga tui semna hmanraw hrang hrang thawm that mek anih avang erawh chuan tun dinhmunah mitin hnena nitin, litre 135 pek theih anih rih loh thu a sawi bawk.
Tlawng lui, Tanhril rama Setlak lui in afinna kiang atanga tui pump chhoh, 37 MLD Project hi kum 2018 atanga thawh tan kha niin SIPMIU, UD&PA Department chuan an thawk a, diesel engine hmangin September ni 22 atanga ni 24 chhung khan Trial- Run neih a ni.
SIPMIU thuchhuahin a tarlan danin, he project hi Aizawl khawpui tan chhinchhiah tlak tak a ni a, kum engemawchen Greater Aizawl Water Supply, Phase- I leh II in mal khalh tak leh indaih lo taka Aizawl khawpui a chawm thin chu Plant thar hian nasa takin a pui dawn a. SIPMIU in khawpui chhung tuam chhuaka, pipeline thar leh lian aphum tawh te onal Tank thar an sak te chuan mipui hnenah tui sem a ti awlsam tawh dawn a ni.
Nimin khan PHE Minister chuan Laipuitlang a, tuizem lianah khawl hmet nungin tui a luan luh tir a ni.