Court of special judge (Prevention of corruption act) chuan eiruk thubuaia thiam loh a chantir Chakma Autonomous District Council (CADC)-a chairman ni lai Kali Kumar Tongchangya chu kum 4 chhung jail tang tur leh Rs nuai 4 chawi turin a hrem.
Aizawl district Court-a special judge (PC Act) Dr HTC Lalrinchhana chuan nimin khan KK Tongchangya hremna hi a puang a, Section 409 of IPC leh Section 13 (2) of the PC Act, 1988 hnuaiah te hremna hi pe in, kum 4 jail tang tur leh Rs nuai 4 chawi turin a hrem a, pawisa hi a pe thei lo a nih chuan kum 2 dang jail a tan belh ang.
Court thuremna in a tarlan danin, kum 2009-2013 chhung khan khatihlaia CADC Chief Executive Member Pu KK Tongchangya kaihhruai hnuaiah Non-Lapsable Central Pool of Resources (NLCPR) sum Longpuighat leh Kukurduleya khaw inkar kawng siamna tur cheng nuai 179, sang 3 leh 773 zet chu khawih chingpen a ni,
Thubuai chhuitu ACB chuan sum tihchingpen atangin Rs nuai 126 a man let a, thuhretute thusawi leh ACB thil man hrang hrang atangin thubuai ngaihtuahtu special judge (PC Act) chuan KK Tongchangya hi thiam loh a chan tir a, nimin khan a hremna hi a puang ta a ni.
Eiruk thubuai chhuitu ACB te sum man chu court thu pek angin sawrkar sumbawmah chhun luh tawh a ni a. Thiam loh chantir tak CADC chairman ni lai Pu KK Tongchangya chu nimin khan jail-ah dah luh a ni tawh a ni.
Court of Special judge chuan hremna pek a nih chhan tarlangin, Mizoramah Political party bil hamthatna tura mipui sum pawhpen chu a awm chawk nia a lan thute, thuhnu dawn taka hremna chuan pek a nih loh chuan mipui nawlpui in a tur ve renga ngaia pal zam hun a thlen palh a hlauhawm tihte sawiin, tualchhung Politics-a hruaitute hlemhletna chu palzam a nih chuan hun lokal turah hlemhletna hi a tai darh nasa thei hle dawn tih a tarlang a ni.