Lei chhuah thin rawh

• Dr. C. Lalrampana

Lei hi thil lian tehchiam ni lem lo mah se, Taksa bung hrang zingah chuan pawimawh ‘ve tiu teu tak a ni. A tel lovin mihring a famkim thei lo. Lei khawng, lei tãwt leh lei piangsualte an awm a; a thente phei chu an dinhmun azirin tawng thei lo an awm nual bawk thin. Chuvangin, lei hi a pawimawhiin a tangkai takzet a ni.

Hetiang hi a nih avangin taksa bung hrang zingah te hle mah se “Nang Bethlehem, Judai ram khawpuite zingah i te ber tawp lo…….” tih ang mai khan Mihring taksa bung hrang zingah thunun har ber a ni tih Bible atangin a hriat theih.

Jakoba 3:1-12 kan chhiar chuan ramsa/rannungte chu khãwi ngam theih an ni a; Lei erawh khãwi ngam theih hleih theih a nih loh thu Tirhkoh Jakoba chuan a tarlang. Mahse, hetiang a nih reng lai hian mihring tan a tangkai hle a; chungte chu hetiangin tarlang ila.

A TANGKAINA:

1. Fiahfai taka tawng theih nan leh inbiaktawn theih nan;
2. Pathian fak nan leh chawimawi nan;
3. Chanchin tha puandarh nan;
4. Tui hriat nan leh thil ei tanpuitu atan;
5. Mi tihlawm nan leh biahthu di hlan nan;
6. Chaw leh thil ei apianga kãa chil nena lo chawhpawlh hnangtu atan;

A THATLOHNA:

1. Mi rel leh mi pawi sawina
2. Dãwt sawina leh mi bumna
3. Biathu der hlanna
4. Lei chawi theihna
5. Inhuatna/intuithlarna leh indona thlentu;
6. Thudik lo leh thutak belhchian dãwl lo puan chhuah nan;
7. Mi fak der nan leh Indona hial thlentu atan;
8. Inbum nan leh inreltawn nan;
9. A langa tha ãwm taka inchhekarbãwm nan etc.

A thatna leh thatlohna sawi tur a tam thei hle ang. Sawi vek sen a ni lo.

Tãrlan kan tum chhan tak zawk chu mihring hriselna atana Lei chhuah tangkaina awm chhun hi a ni. Lei chhuah hi a dik lo zawnga hman chuan insualna leh inhauna thlentu a nih bakah inhmuhsitna theihtawpah ngaih theih a ni. Zah thup nan thil sawi paha lei sei taka han chhuah deuh hlui ching thinte pawh hmeichhe zingah an awm fova, mipa thenkhat zingah pawh ching an awm ve zauh thin. Inhmuhsit leh inthamlohzia tihlan nana lei inchhuahkhum hi hotein lang mah se huathlala tak leh runthlak tak a nih avangin naupan lai phei chuan inbakkaihna thlentirtu tam ber a ni a tih theih hial awm e.

Nupa leh inngaizawngte tan erawh han infawh paha Leia han inhawltawn nan leh lei inchhuahtawn nan chuan thil pawi lem lo tak leh huatthlalaawm lo tak a ni thei awm e. A aia ril zawka hman tangkai thin pawh niin a lang.

HRISELNA ATAN: Hriselna atan lei chhuah hian tangkaina lai a nei ve tlat. A bikin mihring ranvulh ui leh ransa etc. te hian an hah chang hian sei takin an lei an chhuah fo thin. Hetianga lei an chhuah hian an hnar atang ringawta an thawk sen loh vangin an ka atangin an paih chhuak tel a, chutih rualin an mamawh boruak tha an hip luh tam phah a, chu chu an chuapin a tawktein a lo dawngsawngin a lo semrual zung zung a, an thawchham mai tur vengin an lungphu a siamdik zung zung thei thin a ni.

Mihring tan pawh awmze nei taka lei chhuah thin hi a pawimawh hle. Tuktin zingkarah kaw ruah laiin bawp khawkherhin ngil takin thu la, i theih tãwka seiin i lei chhuah thin la; minute 2 chhung tal a ngai bawkin chhuah nawn thin ang che. Hetianga awmze nei tak leh hunbi neia lei chhuah hi hrawk thip tihreh nan leh hrawk hnawk tihreh nan te; mit chak lo leh mitvai tihreh nan leh khawhmuh fiah loh tihziaawm nante a tangkai hle nia ngaih a nih bakah hmêl mawi nan pawh a tangkai hle. Chuvangin, mi rel nan leh mi pawi sawi nan hmang tangkai lovin Pathian fak nan leh chãwimãwi nana i hman bakah i hrawk hrisel nan leh mit fiah nan bakah i lo hmel that zawk nan tuktin i thawh veleh i theihtawpa seiin i lei chhuah thin la hlãwkna ropui tak i hmu thei ngei ang.