Juventus tan striker Arkadiusz Milik chuan second half-ah inkhel a goal awmchhun a khung a, 1-0 in Lecce lakah hnehna an chang.
Thawhlehni zana Allianz Stadium a hnehna an chan avangin Juve hi Serie A-ah pahnihnaah an inhlangkai a. An inkhelah hian Lecce in khauh takin an tlarhnung veng mahse goal hlauhawm erawh an siam tam lova, Juve goal zawna goal hlauhawm siam an nei miah lo.
Federico Chiesa hmanga first half a goal an khung teuh hnuah second half minute 57-naah Adrien Rabiot ball tauh let atangin Poland striker Milik-a’n goal a khung.
Juve manager Massimiliano Allegri chuan, “Lecce team khan min dan an tum tlat a, kha khan thil a ti awlsam lo hle. Mahse kan talbuai phah lova, chance tha kan insiam reng thei tho.”
“Kan tan chak hi a pawimawh a, a bik takin Sassuolo lakah inkhel kan thunun theih loh avangin kan tlawm a, point hmuh a pawimawh.” a ti a.
League title lam an thlir lo tih sawiin, “Tlang taka thlirin Inter, AC Milan leh Napoli te keini aiin squad tihchak theihna nei zawk an ni a, chuvangin kan tan lo sawilawk theih a ni lo.” a ti.