Mizoram Govt. Ad hoc Aided School Teachers Union (MIGASTU)-in Mizoram sorkar, Chief Minister Zoramthanga kaihhruaiin tun thla ni 27-a Cabinet Meeting-a Ad hoc Aided School te sorkar School (Provincialised Status)-a hlankai an remtih avanga an lawmthu an sawi a. “Pathian leh kan sorkar chungah kan lawm takzet a ni” an ti.
MIGASTU chuan “kum 20 zet Aided school ni chunga khawtlang tana kan thiamna zawng zawng leh kan thatlai hun zawng zawng kan hmanral tawh hnua kan dinhmun leh khawtlang dinhmun te min thlirsak chunga min upgrade ta hi kan va lawm tak em!” an ti a. “He dinhmun duhawm taka kan din theihna tura chak taka hma min laksak thintu Education Minister zahawm tak, a ngaihna hria, Pu Lalchhandama Ralte chungah lawmthu kan sawi a. Kan Secretary leh Director nena an lungrualna leh thawhhona kan theihnghilh ngai lo ang” an ti.
“Vantlang school te chhawmdawla, vantlang mipui rethei ber te banphaka zirna tha zawk kan rama min chhawpchhuahsak thintu, Pu Zoramthanga kaihhruai sorkar hian Zirna hi ram leh hnam hmasawnna rahbi pawimawh ber pakhat a nih zia hre chunga sum harsa tak chunga kan thiamna leh theihnate khawtlang tana phur taka kan hman chhoh zel theihna tura vantlang enkawl school te min upgrade thin hi kan va chhuang thin tak em!” MIGASTU chuan an ti a. “Thalai lehkhathiam te tan zirtirtu hna hi hna zahawm a nih zia leh zirna siamtha tura sorkar pawimawh zia tarlang thintu sorkar kan nei hi keini thalai rualte tan hian a va hlu em!” tiin, Mizoram sorkatr chu ram leh hnam, mihausa leh rethei ber te tan pawha Pa nih tling sorkar a nihna a lang nia an hriat thu an sawi.
MIGASTU chuan kum over tawh vanga he hun lawmawm thleng hman ve thei ta lo an thiante an an tawrhpui thu pawh sawiin, chatuan ram pansan ta an thawhpui te leh an chhungte pawh kan lawmna karah an thinlunga an theihnghilh theih loh thu an sawi a. “Keini hi tuma thik phak rual loh tur khawpa service senior tawhte kan ni a, kan thian thenkhatte, Service lama kan nau rualte thleng thlenga an dinhmun chawisansak an ni hi kan lawmpui a ni” a ti.
“Kan Chief Minister zahawm tak Pu Zoramthanga kaihhruai sawrkar leh a ngaihna hre tak kan Education Minister zahawm tak Pu Lalchhandama Ralte te bakah kan sorkar hruaitu Minister leh MLA dang zawng zawng te chungah lawmthu kan sawi a. Kan sorkar department hrang hrang hotute bakah a bik takin Education Department hotu pawimawh zawng zawngte chungah lawmthu kan sawi tak meuh meuh a ni” an ti a. “Sorkar school hi vantlang mipuite tan malsawmna a nih zia leh zirna siamthatna hmun pawimawh a nih zia lantir turin theihtawpin tanlak deuh deuh kan tum dawn a ni tih kan ram hruaitute leh ram mipuite hriatah kan puang” an ti bawk a ni.