Aizawl : Cheng nuai 20 senga sak Saiphai khuaa Forest Rest House thar chu Forest minister TJ Lalnuntluanga’n nimin khan a hawng.
Saiphai Forest Rest House hi Forest Department hnuaia Maintenance Fund atanga sum hmuh cheng nuai 20 senga sak a ni a. March ni 7, 2023 khan sak tan niin, August ni 4, 2023-ah sak pum a ni a, a chhung chei zawng zawng nen September ni 27, 2023-ah zawh fel a ni a. RCC-a sak niin, pindan pali-ah then a ni a. Mutna pindan pahnih bakah, thut khawmna pindan leh choka te a awm a; changtlung takin a chhung chei a ni bawk.
Forest Rest House thar hawngtu minister Manuna chuan, Serlui bial chhungah eco-tourism tihlar nan Pualreng Wildlife Sanctuary-ah nungcha che tla thlira ramvahna (jungle safari) kalpui tum a nih thu leh khawpui tana chuap, boruak tha siamtu ramngaw din tura Nagar Van leh Nagar Vatika hnuaia hma lakna tur ruahmanna pawh a kal mek thu a sawi.
Minister chuan, Kolasib Forest Division-in Kolasib District chhunga tui savate chhinchhiahna lehkhabu an buatsaih chu a tlangzarh bawk.
He huna khualzahawm Serlui bialtu MLA, Rubber & Allied Crops Development Board Vice Chairman Lalrinsanga Ralte pawhin thu sawiin, Saiphaia Forest Rest House changtlung tak sak a ni chu lawmawm a tih thu sawiin, hma laksaktu Chief Minister leh EF&CC Minister chungah leh EF&CC hotute leh thawktute chungah lawm thu a sawi.
Saiphai chu ramri depa awm a nih avangin mikhual pawimawhte thlenna tur khualbuk mamawhna a sang hle tih sawiin, EF&CC-in Rest House an dah chu a lawmawmin, khawtlang tan pawh thil chhinchhiah tlak tak a ni, a ti a. Department-in khawtlang an duhsakna chu hria a, tha taka anmahni thawhpui zel tur leh Forest Rest House enkawlnaah pawh dimdawih taka enkawlpui turin khawtlang mipuite chu a chah a ni.