Aizawl: Mizoram Pradesh Mahila Congress Committee in nilainia Vanapa Hall a General Conference hmanpuitu Congress Legislature Party Leader Zodintluanga Ralte chuan, “MNF sorkar hnuaiah hian mirethei te an rethei a, sum leng vak a tlem a, sumdawngte an in hralh thei lo a, hei hi tihluihna a ni. Vawiinah hian rethei taka min dah a, kan pumpui hnuna min hnuh a, sorkar an tum a ni,” a ti.
Zodintluanga Ralte chuan MNF sorkar hnuaiah sorkar hnathawk ten hlawh an la mumal thei lo va, retheiin min siam a, Mizoram budget hmasawnna hnathawh nan hmang lova vote lei nan a hman tumah puhin, “SEDP te hi, a dawng tawh tam tak Congress ah an rawn lut mek a ni” a ti bawk.
India ramah Indian National Congress a lal apiangin Mizoten hmasawnna kan hmu thin a, Mizoramah pawh congress a sorkar apiangin hmasawnna a awm thin a, remna leh muanna a awm thin thu a sawi bawk.
CLP Leader chuan, “Mizoramah hmasawnna a awm ngai lo ti tu te hi hei hi ka chah duh, Aizawl tui lak phase 1 leh 2 te, nimin lawka hawn 37 MLD Water Treatment Plant te, Airport te, Medical College, Vety College, Horticulture college te pawh Congress sawrkar laia din a ni a. Mizoram Hydel Project hmasa ber Tuirial Hydel Project te pawh Congress hunlai a din a ni. Mirethei tam tak in kan sak sak bawk a ni” tiin a sawi.
Congress thiltih that hmu duh miah lo party an tih sawiin Zodintluanga Ralte chuan, “ZPM Leader Pu Lalduhoma hi kum 1984 atangin MLA a in candidate tawh a, mahse mipui in thuneihna pek tlakah an ngai lo a ni. Tunah pawh hian an pek ka ring lo thudik lo a sawi thin avangin, Kohhran upa huaisen taka dawt sawi thin a ni tih hi Mizoram mipui hian an hria a ni” a ti.
“Kum 2019 ah zu khapna dan kan pass a, zu in phal loh, zu zawrh phal loh a ni. Mahse MLA, Dan siamtu in a naute zu man a lo pe thin anih chu mawle! Kohhran upa a ni bawk a, A nau, a zinpui te zu in lo tura zirtir lovin zu man a pe thin nia mawle!” tiin Zodintluanga chuan a sawi.
“ZPM ah chuan a haw hnuhnung hnung thu a tlang thin an tih te hi kan ngaihtuah a ngai a ni. Pu KS Thanga pawh an hotu lu ten Vice President turin an sawm a, mahse a haw hnuhnung te vang nge ni, Vice President ah an dah duh leh ta lo a ni. Keini chuan Pu Lalnunmawia Chuaungo kan sawm a, kan dah mai a ni. Chuvangin kan ram hruai turin kan duh dawn em ni?” tiin a sawi bawk.