Madrid derby a an tlawm hnuah Real Madrid an tho lehnghal a, La Liga-ah pahnihnaah inhlangkai turin Las Palmas lakah 2-0 in hnehna an chang.
Nilaini zanah Santiago Bernabéu-ah Real hian league table mawng lama awm Las Palmas hi an mikhual a. An manager Carlo Ancelotti chuan Atletico Madrid hmachhawntu team atang mi panga thlak danglamin an top scorer nilai Jude Bellingham chu a chawlh hahdam tir a, a aiah Brahim Diaz chu tun season ah a vawikhatna atan inkhel bul a tan tir.
Los Blancos hi inkhel a chungnung zawk ni nghalin chance tha an insiam hnem hle a. Diaz leh striker Joselu ten huntha an neih atang goal an khung lo.
Las Palmas goalkeeper Álvaro Valles a che tha bawk a, Real goal khung tur vawi engemaw zat a dansak.
Blancos defender David Alaba inhliam thlaktu substitute Lucas Vázquez chuan halftime dawnah Diaz goal khung tur a siamsak a. Second half-ah Joselu-a’n an goal hnihna a khung.
Real in inhliam an neih belh zel a, Thibaut Courtois leh Éder Militão te tun season-ah an inkhelh leh theih a beiseiawm loh bakah rawlthar Arda Güler a inhliam nawn leh bawk.
Hetihlai hian Brazil attacker Vinícius Júnior leh Ferland Mendy te erawh an inkhel leh thei tawh.
Ancelotti chuan, “A tha lam kan thlir ang. Mendy a lo kir leh tawh a. Carvajal pawh a dam tawh. Rudiger inhliam a na lova, Inrinni ah a inkhelh theih kan beisei. Alaba a chawl rih anga, mahse a inhliam nat zawng hi beiseina nen kan thlir ang.” tiin a sawi.