Season hmasaah final-ah an tlawm a, tun season-ah pen khat a thui kal tumin Newcastle United in bul an tan a, Premier League champion Manchester City chu English Football League Cup atangin an pet chhuak.
Sponsorship avanga Carabao Cup tia hming an vuah inelna third round-ah hian club pahnihte hi St. James’ Park-ah an inkhel a. An starting XI a an chhawr thin player thenkhatte chawlh tir ve ve in team dang deuh an rem a. Second half-ah Newcastle United chu kheltha zawk niin 1-0 in Aleksandar Isak goal khung an chakpui.
Nikum final a Manchester United laka tlawm Magpies hian Sheffield United laka goal riat khungtu team atangin player 10 an thlak danglam a. Hei hi inkhelah langin Manchester City in inkhel an thunun hneh.
Second half-ah Bruno Guimaraes leh Anthony Gordon te dahluh an nih hnuah erawh inkhel a danglam hle a, Magpies in hma sawn sawtin Joelinton thawhrah atangin Isak-a’n chakna goal a khung.
Boss Eddie How chuan, “Kan inkhelh hma in nikum lam kan rilruah a awm. Kan season ti kaltluangtu leh phurna min petu a ni a, final erawhin league lama kan inkhel thleng a nghawng.”
“Nikum lamin inrintawkna lian tak min siamsak a, tun tumah pen khat a thui zawk kal kan duh.” tiin a sawi.
Liverpool ‘comeback’
Tun season-ah an vawikhatna a ni lova, mahse team tha an nihna erawh tilangtu a ni. Liverpool in goal chhuah hmasa zawk mahse 3-1 in Leicester City an lehthal a. “Comeback” hnehna an chang.
Anfield-ah Foxes tan Kasey McAteer chuan minute thumna lekah goal a khung a. Liverpool in sut tumin bei ngawrh mahse goal an khung thei lo. Harvey Elliot leh Ben Doak ten goal ban an pet per ve ve.
Second half-ah erawh Cody Gakpo-a’n goal a khung nghal thuai hnuah Reds an chungnung a. An midfielder pawimawh ni nghal Dominik Szoboszlai chuan an goal hnihna khungin Diogo Jota in goal a khung leh bawk.
London lam
Arsenal in Brentford hmachhawnin Reiss Nelson-a’n minute 8-na a goal a khung hmangin hnehna an chang.
Gtech Community Stadium-ah Arsenal goalkeeper Aaron Ramsdale a che tha a, mualneitu lam goal khung tur a dan a pawimawh thin.
Chelsea in tunhnaia chak an harsat hle thin chu an titawp a. Brighton & Hove Albion chu 1-0 in an hneh.
Stamford Bridge-ah Blues tan hian striker Nicolas Jackson chuan inkhel a goal awmchhun a khung a. Tunhnaiah match li atanga vawi khat Blues hi an chakna a ni.
- Carabao Cup fourth round tie:
Mansfield v Port Vale
Ipswich v Fulham
Manchester United v Newcastle United
Bournemouth v Liverpool
Chelsea v Blackburn Rovers
West Ham United v Arsenal
Everton v Burnley
Exeter City v Middlesbrough