Atletico Madrid in inkhel boruak sosang takah hnehna an chang a. Goal hnih khungin 2-0 in Osasuna lakah chakin an league dinhmun an siamtha.

Ningani zana El Sadar Stadium a La Liga inkhelah hian huntawp dawnah team pahnih inkarah buaina a chhuak a. Player hnawhchhuah an nei ve ve a ni.

Atletico tan hian Antoine Griezmann leh Rodrigo Riquelme ten goal an khung.

Rojiblancos an vannei

Stadium khat a an fans te hmaah Osasuna in bul an tan tha a. Goal hlauhawm siam nghalin Lucas Torro chuan penalty area hmawr atangin goal a khung teuh.

Mahse Atletico Madrid zawkin chhanglet nghalin an nawr letnaah goal an khung a. Osasuna goalkeeper Aitor Fernandez chuan Samuel Lino ball cross a man thei lova, heta ball per hi Antoine Griezmann chuan nang hmasa berin an goal hmahruai ni turin a khung.

Si phur zawk nimahsela Osasuna an kheltha zawk a, ball thunun zawkin goal hlauhawm siam mumal zawk an ni a. An left-winger Johan Mojica chuan defender pahnih bumin goal ropui a khung teuh hle.

Second half-ah pawh Osasuna an hlauhawm chhunzawm a, Atletico goalkeeper Jan Oblak chuan Torro goal khung tur hmun leh hmunah a save sak bawk.

Osasuna hian minute 75-naah David Garcia hmanga goal an khung chu pawm a ni lova, manager Jagoba Arraste chuan thutlukna a sawisel avangin red card a hmu.

Full-back kheltha Samuel Lino bawk Atletico goal hnihna bultumtu a ni a, a ball pek tha atangin substitute Riquelme-a’n goal a khung.

Huntawp dawnah Alvaro Morata leh Chimy Avila te an intihbuai avangin hnawhchhuah an ni bawk.

Atletico manager Diego Simeone chuan, “Helaia kan inkhelh apiang hian harsatna engemaw kan nei ziah. Zanin inkhel pawh harsatna kan tawh thin avangin a rei duh hle.” tiin a sawi.