Aizawl: Governor Secretariat leh Commerce & Industries department tangkawp chuan India ‘Hnam pa’ Mahatma Gandhi piancham denchhenin October ni 2-4,2023 chhung hian Raj Bhawan ah ‘The Grand Gandhi Jayanti Exhibition’ an buatsaih dawn.
Exhibition an buatsaih tur chungchangah hian Commerce & Industries department hotute chuan nimin khan Aizawl Press Club-ah chanchinbu mite kawmin, Mizoram Larsap Dr Kambhampati Haribabu ruahmanna in Mahatma Gandhi piancham lawm nan leh hriat rengna atan exihibition hi buatsaih an tum thu an sawi a, an thil tum ber chu Mahatma Gandhi-a’n mahni tualchhung siam chhuah hmanga intodelh a, ramchhung thil siam chhuahte a tam thei ang ber hman pawimawh a tih zia leh tualchhung siam chhuah thil chi hrang hrang uar chhunzawm zel a tul zia tih lanna tur a nih thu an sawi.
Exhibition-ah hian Mizo siam chhuah handllom leh handicrafts thil chi hrang hrang lei tur a awm dawn bakah ei tur tuihnai chi hrang hrang lei thei turin food court ruahman a nih thu C&I department hotute chun an sawi a, Mizoram rural bank pawhin sorkar laipui hnuaia ministry leh department hrang hrangte hnuaia hamthatna chi hrang hrang, kut hnathawkuten an hman tangkai theih turte phochhuah bakah bank dawr dan kal hmang inhrilhfiahna turin stall an hawng dawn tih an sawi.
Commerce & Industries department hotute’n an sawi danin, Exhibition hi Larsap chuan October ni 2,2023 zing dar 10 ah a hawng ang a, Zing dar 10 atanga tlai dar 7 thleng mipui tan tlawh theih a ni anga, october ni 1 tlai dar 4:30 ah cultural programe te nen Larsap in a khar ang.