Aizawl: District Institute of Education and Training (DIET), Aizawl-a zirlaite chuan DIET campus huam chhung thenkhat Aizawl North College campus-a rih luh tumna a awm nia an hriat avangin nimin chhun khan darkar khat chhung Ramhlun North ah kawngpui an dang.
DIET zirlaite hi nimin chawhma dar 11 atang khan DIEST Campus bul, Ramhlun North-a kawngpui thu in, lirthei kaltlang theih loh turin kawng hi an dang tan a, lungawilohna an lantir chhan chu DIET campus huam chhung ami DIET Principal Quarters chu Govt. Aizawl North College Campus-a rinluh tum a, hmalakna awm an duh loh vang a nih thu leh DIET ram sahthlak tumna awm chu ti tawp tura sorkar an phut thute DIET Trainees’ Union hruaitute chuan an sawi a, darkar khat bawl vel kawng an dan hnuah an thil phut te chu sorkarin a hre tawh tura an ngaih avangin kawng an dan chu an ti tawp a ni.
DIET Trainees’ Union hruaitute’n an sawi danin, Aizawl North College-in college ram pek belh sorkara an dil chungchangah August thla tir khan General Administrative Department, Secretary hoin hemi kaihhnawih department-a tel te an thukhawm a, SCERT Director leh DIET Principal-te erawh koh an ni ve lo a, he thutkhawmah hian Research committee in GANC campus atana an rawt Commerce and Industry Market building te, DIET residential quarters leh LAD office te chu Chief minister hnenah theh luh an rel.
Hemi chungchang hi tunhnaia Council of minister te thukhawm chuan ngaihtuahin, DIET campus thenkhat chu North College campus chhungah rin luh rem tiin, Revenue department te hma la zui turin thuthlukna a siam niin an hria a, DIET ram chhung te sahthlak a nih fo tawh hnuah tunah a ram chhung thenkhat sahthlak leh tumna awm chu an duh lo a, a tawp thlenga dodal an tum a ni.