- Lallunghnema, Charity Lodge
Tun hnai tê a Consumer Complaint ka dawn tam zâwk chu inbumna a ni a. Mizoram hmun hrang hrang atanga ka phone call dawn te chu, a tam poh leh inbumna a tam tihna a ni. Entirna tlëm chauh ka sawi ang.
Khawkawn nu pakhat chu Aizawl nula pakhatin a bum a. A pawisa Rs. 5000 chuang a chân phah. Aizawl nu hian he khua a nu pakhat hnenah a bungraw lei duh ang chu tlawm te a a pek theih thu leh a hnena gpay a bungraw man chu thawn tur leh a rang thei ang bera a deliver-sak theih thu a hrilh a. (a hming ka tarlang ta lo mai! – llh) . Hetiang hi a tha takin he nu hian amah bum tumtu phone numberah chuan gpay-in pawisa chu a zu thawn a. Mahse ni 7 chu sawi loh thla eng emaw zat liam hnuah pawh chuan Drawer chu a la deliver sak thei lo a ni. Drawer zuartu inti hian dawr pawh a lo nei i khaw lo mai a. An inbum chiang hle! Mahse, kan la beihpui zel a, eng tak ang dawn maw. Inbum hi an huai hle a, bum kan awlsam hle bawk a ni.
Inbumna pahnihna :
Ka file hlui ka han keuva, kum 3 vel kal ta a, ka complaint dawn ka hai chhuak nawlh mai a! Vaipa Ketan Shah-a’n Mizo nula a bum buaina a ni. He kutziak ka hmuh hi ka han copy a, ka rawn tarlang a ni.
Bumtu : Ketan Shah
Cornell Technology, 503 Shikhar
Complex. Opp. Navreet House.,
Gurukul, Ahmedabad.
-380052
A bum : Mizo nula(a hming thup)
Pawisa pek zat : Rs. 15,0306/-
Refund zat : Rs. 50000/-
Amount due : Rs. 100306/-
Sawi zauna a, a inziah dan ang angin:
“July thla tawpah laptop hi ka order a, amount bank transfer-in ka thawn a. Gujarat-a ‘flood’ a awm avangin a rawn thawn(ship) thei lo phawt a. Chumi hnuah, ‘flood’ avanga an warehouse a bungraw chhiat vangin sum an ‘loss’ hman vangin a rawn thawn theih rih loh thu a rawn sawi leh a. Hre thiam hram turin min ti leh a. October thla kha chuan min refund turin ka ngen ta a. Rs. 5000/- min pe lêt a, laptop ka rawn thawn ang a, pawisa bang zawng pawh ka rawn thawn tho ang a, i dawn hunah min rawn pe leh mai dawn nia pawisa chu”, a ti a. Mahse, pawisa chu min rawn thawn let lo ve ve a. Damdawi in a awm leh angin a insawi leh a. November thla tawp lam atang khan a call leh text a la/reply tawh lo a ni.
Nimin piah, chu chu ni 27, Sept 2023 a ni a. Kan nau hi ka va call a chanchin kan inhriat tak loh avangin ka va be lua lâm a ni ber. Vaipa Ketan Shah a hian a bum hmin der mai hi a lo ni a. Cheng nuai khat chuang chu a fanghma no ei sak hmiah tihna a ni . A va uiawm em! He vaipa hi ka han be dawn ngial a, ka be tlang thei ta lo a ni. A pawi hle a ni.
Bungraw tha lo lei te hi chu nep te a ni ta!. Biak pawh theih loh, phone call lâk duh loh thleng thlenga inbumna buaipui hi chu a hahthlak ngawt mai! Mizote hi fimkhur teh u. Mi rinawm lo ho bumna hi a râpthlak êm êm a ni.
Dawr nei miah si lo, dawr nei a insawi Bungrua zuar miah lo, zuar a insawi. Heng ho lakah hian rilru nei teh u. I pawisa kha hman chak lutuk suh, pawisa hman nuam ti lutuk suh. Khawl(save) tum hram teh. Thil awh ngah lutuk suh. Vairama mi a tha chuang lo. A tlawm bik chuang lo.
He thil thleng atang a lo inzir tura ngen i ni :
Sap tawngin heti hian ziak a ni –
“Consumer Court fines Xerox Shop owner Rs. 25000/- For Refusing to Return Rs 3/- to customer.”
Mizo tawngin : “Xerox Dawr neitu pakhat chuan a customer hnena Rs. 3/- a pek kir duh loh avangin Consumer Court chuan Rs. 25000/- a chawitir.”
Sambalpur District Consumer Disputes Redressal Commission chuan Xerox Shop pakhat neitu chu Rs. 25000/- zet chawi turin thutlukna a siam a. Rs 3/- refund turin Xerox Dawr hi order an ni bawk.
He Xerox owner hian anmahni dawrtu chanchinbu mi, Prafulla Kurar Dash-a Budharaja a cheng hnenah Xerox tihna man Rs. 3/- an refund duh lo a ni.Hei hi Unfair Trade Practice a ni a,sec.2(47) Consumer Prorection Act 2019 bawhchhiatna a ni.
Mizoramah hian hetiang lama ngaihtuahna seng peih mi huaisen hi kan mamawh em em a ni.